Indiramma Houses: ఇందిరమ్మ ఇళ్లపై సర్కార్ కీలక అప్డేట్.. డిసెంబర్ మొదటి వారంలో పథకం ప్రారంభం
ఈ వార్తాకథనం ఏంటి
తెలంగాణ కాంగ్రెస్ ఎన్నికల సమయంలో ఇచ్చిన ప్రధాన హామీలలో "ఇందిరమ్మ ఇళ్ల పథకం" కూడా ఒకటి.
పార్టీ అధికారంలోకి వస్తే, ఇండ్లలేని పేదలకు ఇందిరమ్మ ఇళ్లు నిర్మించి ఇస్తామని హామీ ఇచ్చింది.
ఖాళీ జాగాలో పేదల ఇళ్ల నిర్మాణానికి రూ.5లక్షల ఆర్థిక సహాయం అందిస్తామని ప్రకటించారు.
జాగాలు లేని వారికీ జాగాతో పాటు రూ.5లక్షల ఆర్థిక సహాయం ఇవ్వడం మాట ఇచ్చారు. ఈ హామీని అమలు చేసే దిశగా తెలంగాణలోని ఇళ్ల లేని పేదలు చాలా కాలంగా ఎదురుచూస్తున్నారు.
ఇప్పటికే సీఎం రేవంత్ రెడ్డి ఇందిరమ్మ ఇళ్ల పథకాన్ని డిసెంబర్ మొదటి వారంలో ప్రారంభించనున్నట్లు ప్రకటించారు.
ఈ ప్రకటన నేపథ్యంలో గృహనిర్మాణశాఖ మంత్రి పొంగులేటి శ్రీనివాస్ రెడ్డి కీలక సమాచారం ఇచ్చారు.
వివరాలు
రూ. 3 వేల కోట్ల నిధులు కేటాయింపు
5 డిసెంబర్ నుంచి ఇందిరమ్మ ఇళ్ల యాప్ అందుబాటులోకి రానుందని మంత్రి తెలిపారు.
దీనితో, సీఎం రేవంత్ రెడ్డి చేతుల మీదుగా ఇందిరమ్మ ఇళ్లను ప్రారంభించనున్నట్లు వెల్లడించారు.
ప్రారంభ దశలో, తెలంగాణ వ్యాప్తంగా 4.5 లక్షల ఇళ్లు మంజూరు చేయాలని నిర్ణయించారని మంత్రి చెప్పారు.
ప్రతి నియోజకవర్గానికి 3500 ఇళ్లు చొప్పున అందించనున్నారు. ఇందుకోసం రూ. 3 వేల కోట్ల నిధులు కేటాయించారని మంత్రి పేర్కొన్నారు.
ఇళ్ల లబ్ధిదారులను ఎంపిక చేసేందుకు గ్రామాల్లో ఇందిరమ్మ కమిటీలను ఏర్పాటు చేసినట్లు తెలిపారు. ఈ పథకం తరువాతి నాలుగేళ్లపాటు కొనసాగుతుందని చెప్పారు.
వివరాలు
సీఎం రేవంత్ రెడ్డి కీలక సూచనలు
ఇందిరమ్మ ఇళ్ల లబ్ధిదారుల ఎంపికపై సీఎం రేవంత్ రెడ్డి కీలక సూచనలు చేశారు.
అందులో, అత్యంత నిరుపేదలకు, ముఖ్యంగా దివ్యాంగులు, వ్యవసాయ కూలీలు, సాగుబూమి లేని వారు, పారిశుద్ధ్య కార్మికులు మొదలైన వారికి ముందస్తు ప్రాధాన్యత ఇవ్వాలని సూచించారు.
మొదటి దశలో సొంత స్థలాలున్న వారికి ప్రాధాన్యత ఇవ్వాలని, ఈ విషయంలో అవసరమైన జాగ్రత్తలు తీసుకోవాలని తెలిపారు.
గ్రామ కార్యదర్శులు, మండల స్థాయి అధికారులు దీనిపై కృషి చేయాలని సూచించారు.
ఇందిరమ్మ యాప్‌లో ఎలాంటి లోపాలు లేకుండా సాంకేతికతను వినియోగించాలని, తద్వారా గడువు గడిచినపుడు ఎలాంటి సమస్యలు రాకుండా చూసుకోవాలని సీఎం ఆదేశించారు.
అదేవిధంగా ఆదివాసీ ప్రాంతాలలో, ఐటీడీఏ పరిధిలో ప్రత్యేక కోటా ఏర్పాటుకు చర్యలు తీసుకోవాలని కూడా ఆయన అన్నారు.