Janasena: నేడు జనసేన పార్టీ ఆవిర్భావ దినోత్సవం.. పిఠాపురం కదిలివచ్చిన జనసైనికులు..
ఈ వార్తాకథనం ఏంటి
ఇరు తెలుగు రాష్ట్రాల ప్రజలు ఎంతో ఆసక్తిగా ఎదురుచూస్తున్న జనసేన పార్టీ 12వ ఆవిర్భావ సభ ఈ రోజు (మార్చి 14) పిఠాపురంలో ఘనంగా నిర్వహించనున్నారు.
నియోజకవర్గ పరిధిలోని చిత్రాడ గ్రామంలో సుమారు 50 ఎకరాల విస్తీర్ణంలో ఈ భారీ సభకు అవసరమైన అన్ని ఏర్పాట్లు పూర్తయ్యాయి.
తొలిసారి అధికార కూటమిలో భాగంగా జనసేన కార్యకర్తలు ఈ వేడుకను జరుపుకోవడం, పవన్ కళ్యాణ్ డిప్యూటీ సీఎం హోదాలో తొలి ఆవిర్భావ సభను నిర్వహించడం పార్టీ శ్రేణుల్లో పండుగ వాతావరణాన్ని నెలకొల్పింది.
శుక్రవారం సాయంత్రం 4 గంటలకు ఈ సభ అధికారికంగా ప్రారంభం కానుంది.
వివరాలు
అకీరా నందన్ లైవ్ ప్రదర్శన
సభ వేదికకు అర కిలోమీటర్ దూరంలో ఏర్పాటు చేసిన హెలీప్యాడ్‌కు పవన్ కళ్యాణ్ హెలీకాప్టర్ ద్వారా చేరుకోనున్నారు.
పార్టీ వర్గాల సమాచారం ప్రకారం, ఆయన సభలో దాదాపు 90 నిమిషాల పాటు ప్రసంగించనున్నారు.
సభ ప్రారంభానికి ముందు వేదికపై వివిధ సాంస్కృతిక కార్యక్రమాలను ప్రదర్శించనున్నారు.
జనసేన ఉద్యమానికి సంబంధించిన ప్రత్యేక కార్యక్రమాలను కూడా ఏర్పాటు చేశారు.
పవన్ కుమారుడు అకీరా నందన్ ఓ లైవ్ ప్రదర్శన ఇవ్వనున్నారని సమాచారం.
జనసైనికులకు స్పష్టంగా కనిపించేలా వేదికను ఎత్తుగా నిర్మించారు. ప్రధాన వేదికపై 250 మంది కూర్చునే విధంగా ఏర్పాట్లు పూర్తి చేశారు.
వివరాలు
సభకు 10 లక్షల మంది జనసైనికులు
అలాగే, వీవీఐపీలు, వీఐపీల కోసం ప్రత్యేక కూర్చొనే ఏర్పాట్లు చేశారు. వాహనాల పార్కింగ్ కోసం ఐదు విభిన్న ప్రదేశాలను కేటాయించారు.
అధికారంలోకి వచ్చిన తర్వాత జనసేన సాధించిన విజయాలను ప్రజలకు తెలియజేయడమే ఈ సభ ప్రధాన ఉద్దేశమని పార్టీ వర్గాలు చెబుతున్నాయి.
ఈ సభకు దాదాపు 10 లక్షల మంది జనసైనికులు హాజరవుతారని అంచనా వేస్తున్నారు.
మొదటిసారి ఎమ్యెల్యేగా గెలిచిన పిఠాపురం ప్రజల సమక్షంలోనే పార్టీ ఆవిర్భావ వేడుకలను నిర్వహించాలని పవన్ కళ్యాణ్ నిర్ణయించుకున్నారని తెలుస్తోంది.
సభకు భారీ స్థాయిలో భద్రతా ఏర్పాట్లు చేశారు. దాదాపు 1,600 మంది పోలీసులను భద్రత కోసం నియమించారు.
కాకినాడ జిల్లా ఎస్పీ గత నాలుగు రోజులుగా చిత్రాడ ప్రాంతంలో ప్రత్యేక పర్యవేక్షణ చేపట్టారు.
వివరాలు
సభ ప్రాంగణంలో 75 సీసీ కెమెరాలు
వివిధ ప్రాంతాల నుంచి వచ్చే జనసైనికులకు ఎలాంటి ఇబ్బందులు కలగకుండా రవాణా, రూట్ మ్యాప్, పార్కింగ్ వంటి ఏర్పాట్లను సమీక్షించారు.
వీవీఐపీల సీటింగ్, వాహనాల పార్కింగ్ లొకేషన్, మహిళలకు ప్రత్యేక గ్యాలరీలు, ఇతర సౌకర్యాలు మొదలైన వాటిని ప్రణాళికాబద్ధంగా అమలు చేశారు.
సభ ప్రాంగణంలో దాదాపు 75 సీసీ కెమెరాలను అమర్చారు. సభా ప్రదేశంలో ఎల్‌ఈడీ స్క్రీన్లు ఏర్పాటు చేసి, వెనుక భాగంలో ఉన్నవారికీ వేదికపై జరిగిన విశేషాలు స్పష్టంగా కనిపించేలా చేశారు.
సభ ఏర్పాట్లను మంత్రి నాదెండ్ల మనోహర్, కాకినాడ ఎంపీ ఉదయ శ్రీనివాస్ సమీక్షిస్తూ ఏర్పాట్లు పర్యవేక్షించారు.
వివరాలు
భారీగా జనసేన జెండాలు, ఫ్లెక్సీలు
జనసేన ఆవిర్భావ సభ నేపథ్యంలో పార్టీ కార్యకర్తలు ఉత్సాహంతో ఉక్కిరిబిక్కిరి అవుతున్నారు.
ముఖ్యంగా గోదావరి జిల్లాల్లో జనసేన జెండాలు, ఫ్లెక్సీలు భారీగా కనిపిస్తున్నాయి.
ముఖ్య నేతలతో పాటు ద్వితీయశ్రేణి నాయకులు, కార్యకర్తలంతా చిత్రాడ చేరుకోవడంతో సభా ప్రాంగణం ఉత్సాహభరితంగా మారింది.
వివరాలు
జగన్‌ను టార్గెట్ చేస్తారా?
సీఎంగా వైఎస్ జగన్ ఇటీవల జనసేనపై తీవ్ర స్థాయిలో వ్యాఖ్యలు చేయడం, 'కార్పొరేటర్‌కు ఎక్కువ, ఎమ్మెల్యేకి తక్కువ' అనే వ్యాఖ్యల నేపథ్యంలో పవన్ కళ్యాణ్ ఎలా స్పందిస్తారనే అంశం ఆసక్తిగా మారింది.
ప్రభుత్వంలో భాగస్వామిగా ఉన్న 9 నెలల కాలంలో పార్టీ సాధించిన విజయాలను ప్రస్తావించడం ఖాయం.
అయితే, విపక్ష వైఎస్సార్‌ కాంగ్రెస్‌పై ఏ స్థాయిలో విమర్శలు చేయబోతారన్నది ఉత్కంఠగా మారింది.
ప్రస్తుత రాజకీయ పరిస్థితులను దృష్టిలో ఉంచుకుని పవన్ ప్రసంగం ఎలా ఉండబోతోందనేది రాజకీయ వర్గాల్లో చర్చనీయాంశంగా మారింది.
విపక్షాలు విధిస్తున్న విమర్శలకు ఆయన ఎలా సమాధానం ఇస్తారో ఈ రోజు స్పష్టమవుతుంది.