Andhrapradesh: తెలంగాణ-ఆంధ్ర ప్రదేశ్ మధ్య కనెక్టివిటీకి కీలక అడుగు
ఈ వార్తాకథనం ఏంటి
ఏ ప్రాంతం అభివృద్ధి చెందాలంటే మౌలిక సదుపాయాలు అవసరం. ముఖ్యంగా ఇతర ప్రాంతాలతో అనుసంధానానికి కూడా ప్రాధాన్యం ఉంది.
ఈ నేపథ్యంలోనే ప్రభుత్వాలు మౌలిక సదుపాయాల అభివృద్ధి పట్ల ప్రత్యేక దృష్టి సారిస్తున్నాయి.
ఇందులో భాగంగానే కేంద్ర ప్రభుత్వం రెండు రాష్ట్రాల మధ్య మేజర్ రహదారి నిర్మాణానికి చర్యలు చేపట్టింది.
ఇందులో భాగంగా, తెలంగాణలోని వరంగల్ నుంచి ఖమ్మం మీదుగా విజయవాడ వరకు గల భాగంలో జాతీయ రహదారి నిర్మాణానికి శ్రీకారం చుట్టింది.
ఈ ప్రాజెక్ట్‌ను జాతీయ రహదారుల సంస్థ ఆధ్వర్యంలో మేఘా ఇంజినీరింగ్, డీఆర్‌బీ సంస్థలు చేపడుతున్నాయి. మేఘా సంస్థ రెండు ప్యాకేజీలను, డీఆర్‌బీ సంస్థ ఒక ప్యాకేజీని సాధించింది.
వివరాలు
గ్రీన్ ఫీల్డ్ ఎక్స్‌ప్రెస్ వే
ప్రాజెక్ట్ కోసం భూసేకరణ పూర్తయ్యింది. ప్రస్తుతం జంగిల్ క్లియరెన్స్ పనులు జరుగుతున్నాయి.
వరంగల్ నుండి ఖమ్మం మీదుగా విజయవాడ వరకు రహదారి నిర్మాణం జరుగుతుండగా, 16వ నంబర్ జాతీయ రహదారితో అనుసంధానం కాబోతోంది.
ఖమ్మం జిల్లాలోని వెంకటాయపాలెం నుంచి ఏపీ ఎన్టీఆర్ జిల్లా జక్కంపూడి వరకు, 90 కిలోమీటర్ల మేర ఆరు వరుసల గ్రీన్ ఫీల్డ్ ఎక్స్‌ప్రెస్ వే నిర్మాణం చేపడుతున్నారు.
ఈ ప్రాజెక్టు పూర్తి కావడం ద్వారా ఆదిలాబాద్, కరీంనగర్, వరంగల్ జిల్లాల నుండి విజయవాడకు ప్రయాణం సులభతరం అవుతుంది.
వివరాలు
ప్రాజెక్ట్ వివరాలు
ఖమ్మం - విజయవాడ గ్రీన్ ఫీల్డ్ ఎక్స్‌ప్రెస్ వే పనుల ఖర్చు రూ. 4,600 కోట్లుగా అంచనా వేశారు.
మేఘా సంస్థ చేపట్టిన ఈ ప్రాజెక్ట్ ఖమ్మం నుంచి బోనకల్లు, మధిర, ఎర్రుపాలెం, ఏపీలోని చెరువు మాధవరం, జి.కొండూరు మీదుగా రాయనపాడుకు చేరుకుంటుంది.
జక్కంపూడి సమీపంలో విజయవాడ బైపాస్‌కు అనుసంధానం చేస్తారు. ఈ ప్రాజెక్ట్ పూర్తి అవ్వడం ద్వారా ఖమ్మం - విజయవాడ మధ్య దూరం సుమారు 30-40 కిలోమీటర్లు తగ్గనుంది.
ఎన్టీఆర్ జిల్లాలో దాదాపు 26 కిలోమీటర్ల మేర ఎక్స్‌ప్రెస్ వే నిర్మాణం జరుగనుంది.
జి.కొండూరు మండలంలో పలు గ్రామాల్లో భూసేకరణ పూర్తి కాగా,పంటలు ఉండే భూముల్లో సీజన్ పూర్తయ్యాక నిర్మాణ పనులు ప్రారంభమవుతాయి. మొత్తం 93.8198 హెక్టార్ల భూమిని సేకరించారు.