Kaloji University: కాళోజీ వైద్య వర్సిటీ వీసీ నందకుమార్ రెడ్డి రాజీనామా!
ఈ వార్తాకథనం ఏంటి
కాళోజీ వైద్య విశ్వవిద్యాలయం ఉప కులపతి నందకుమార్ రెడ్డిపై తీవ్రస్థాయి ఆరోపణల నేపథ్యంలో తన పదవికి రాజీనామా చేశారు. వర్సిటీలో చోటుచేసుకున్న అవకతవకలపై కఠిన చర్యలు తీసుకోవాలని ముఖ్యమంత్రి రేవంత్ రెడ్డి ఆదేశించడంతో పాటు, వీసీ రాజీనామా చేయాలని అధికారులు సూచించిన నేపథ్యంలో శుక్రవారం ఆయన రాజీనామా సమర్పించారు. ఈ సంబంధిత దస్త్రాన్ని ప్రభుత్వ ప్రధాన కార్యదర్శి అదే సాయంత్రం గవర్నర్‌కు పంపించినట్లు సమాచారం. నందకుమార్ రెడ్డిపై పీజీ, అండర్ గ్రాడ్యుయేట్ పరీక్షల్లో ఫెయిలైన విద్యార్థులకు రీకౌంటింగ్ బదులుగా రీవాల్యుయేషన్ నిర్వహించి పాస్ అయ్యేలా చూడటం, ప్రైవేట్ మెడికల్ కళాశాలల తనిఖీల్లో అక్రమాలు చేపట్టడం వంటి ఆరోపణలు వచ్చాయి.
Details
చర్యలకు అదేశించిన సీఎం
వీటిపై వైద్య ఆరోగ్య శాఖ, విజిలెన్స్, ఎన్‌ఫోర్స్‌మెంట్ విభాగాలు దర్యాప్తు జరిపి ముఖ్యమంత్రికి నివేదిక సమర్పించాయి. రెండు రోజుల క్రితం సీఎస్ రామకృష్ణారావు, వైద్య ఆరోగ్య శాఖ కార్యదర్శి క్రిస్టినా నందకుమార్ రెడ్డిని పిలిపించి వివరణ కోరగా, విజిలెన్స్ అధికారులు పరీక్షల విభాగం రికార్డులను సీజ్ చేసి సమగ్ర నివేదిక సమర్పించారు. దీని అనంతరం ముఖ్యమంత్రి చర్యలకు ఆదేశించినట్లు తెలుస్తోంది. పరీక్ష పేపర్ల మూల్యాంకనంలో అవకతవకలు, ఇష్టారీతిన ఇన్‌ఛార్జుల నియామకం వంటి అంశాలపై ముఖ్యమంత్రి స్వయంగా ఆరా తీశారని సీఎం కార్యాలయం ప్రకటించింది. ఉన్నత వర్సిటీలో ఏర్పడిన అస్తవ్యస్త పరిస్థితులకు కారణమైన వారి మీద కఠిన చర్యలు తీసుకోవాలని సీఎం వైద్య ఆరోగ్య శాఖ ఉన్నతాధికారులకు ఆదేశించారని వెల్లడించింది.
Details
రాజీనామా ఫైల్‌ను గవర్నర్‌కు పంపిన ప్రభుత్వం
ప్రభుత్వానికి చెడ్డపేరు తెచ్చే చర్యలకు ఎవరు కారణమైనా ఉపేక్షించబోమని సీఎం స్పష్టం చేసినట్లు సమాచారం. ఉన్నత విద్యా సంస్థల్లో పని చేసే వారు సమర్థత, పారదర్శకత, నిష్పక్షపాతత్వంతో వ్యవహరించాలని సూచించారు. ముఖ్యమంత్రి ప్రకటన వెలువడిన కొద్దిసేపటికే వీసీ రాజీనామా ఫైల్ గవర్నర్ ఆమోదం కోసం ముందుకు వెళ్లింది. కళాశాలల తనిఖీలకు బృందాలను ముందుగా నియమించడం, చివరి నిమిషంలో వాటిని రద్దు చేయడం, కొన్ని కళాశాలలపై నివేదికలు తెప్పించుకుని వాటిని పక్కన పెట్టి అనుమతులు ఇవ్వడం వంటి అనేక ఆరోపణలు కూడా వీసీపై ఉన్నట్లు తెలుస్తోంది.
Details
రాష్ట్రంలో చర్చనీయాంశంగా మారిన రాజీనామా
పరీక్ష పేపర్ల వాల్యుయేషన్ సహా పలు అక్రమాల ఆరోపణలు నందకుమార్ రెడ్డి రాజీనామాను రాష్ట్రంలో ప్రధాన చర్చనీయాంశంగా మార్చాయి. తెలంగాణ రాష్ట్ర ఏర్పాటు తర్వాత ఈ వర్సిటీకి నియమితులైన రెండో వైస్ ఛాన్సలర్‌గా ఉన్న ఆయన, ఏడాది కూడా పూర్తి కాకముందే ఆరోపణల నేపథ్యంలో రాజీనామా చేయాల్సి రావడం గమనార్హం. ఉమ్మడి ఆంధ్రప్రదేశ్‌లో కూడా ఇలాంటి రాజీనామాలు లేవని వైద్య వర్గాలు వ్యాఖ్యానిస్తున్నాయి.