Nipah: కేరళలో నిపాతో వ్యక్తి మృతి.. అప్రమత్తమైన ప్రభుత్వం.. 151 మందితో కాంటాక్ట్ లిస్ట్
ఈ వార్తాకథనం ఏంటి
కేరళలో నిపా వైరస్ వల్ల ఒక వ్యక్తి మరణించినట్లు రాష్ట్ర ప్రభుత్వం ప్రకటించింది.
మలప్పురం జిల్లాకు చెందిన 24 ఏళ్ల వ్యక్తి, మలప్పురంలోని ఓ ప్రైవేట్ ఆస్పత్రిలో చికిత్స పొందుతూ మరణించినట్లు కేరళ ఆరోగ్య మంత్రి వీణా జార్జ్ ఆదివారం తెలిపారు.
రీజనల్ మెడికల్ ఆఫీసర్ చేసిన డెత్ ఇన్వెస్టిగేషన్ తర్వాత నిపా ఇన్ఫెక్షన్ అనుమానం కలిగిందని, వ్యక్తి నమూనాలను పరీక్షలకు పంపగా, నిపా పాజిటివ్‌గా నిర్ధారణ అయిందని ఆమె వెల్లడించారు.
సెప్టెంబర్ 09న బెంగళూరు నుంచి వచ్చిన ఈ వ్యక్తి మరణించడంతో, తర్వాతి సమయంలో నిపా ఇన్ఫెక్షన్ ఉన్నట్లు తేలింది.
ఈ మరణం తర్వాత నిఫా ఉన్నట్లు తేలడంతో ఆరోగ్యమంత్రి నేతృత్వంలో అత్యున్నత సమావేశం జరిగింది.
వివరాలు
16 కమిటీలను ఏర్పాటు,151 మంది వ్యక్తులతో కూడిన కాంటాక్ట్ లిస్ట్
ప్రోటోకాల్ ప్రకారం తగిన చర్యలు చేపట్టారు. కోజికోడ్ వైద్య కళాశాల, పూణేలోని నేషనల్ ఇన్‌స్టిట్యూట్ ఆఫ్ వైరాలజీ (ఎన్‌ఐవి) నిర్వహించిన పరీక్షల్లోనూ నిపా వైరస్ పాజిటివ్‌గా తేలింది.
ఆశ్చర్యకరమైన ఈ పరిణామం నేపథ్యంలో 16 కమిటీలను ఏర్పాటు చేసి, 151 మంది వ్యక్తులతో కూడిన కాంటాక్ట్ లిస్ట్‌ను గుర్తించామని మంత్రి తెలిపారు.
మరణించిన వ్యక్తి, తన స్నేహితులతో కలిసి వివిధ ప్రాంతాలకు వెళ్లినట్లు గుర్తించారు. అతడితో సన్నిహితంగా ఉన్న ఐదుగురికి జ్వరం, ఇతర లక్షణాలు కనిపించడంతో వారిని ఐసోలేషన్‌లో ఉంచారు.
వివరాలు
గబ్బిలాలలో నిపా యాంటీబాడీస్
అంతకుముందు, జూలై 21న నిపా ఇన్ఫెక్షన్ కారణంగా ఒక బాలుడు మరణించాడు. ఇది రాష్ట్రంలో నమోదైన తొలి కేసు.
2018, 2021, 2023లో కోజికోడ్ జిల్లాలో, 2019లో ఎర్నాకుళం జిల్లాలోనూ నిపా వైరస్ వ్యాప్తి నమోదైంది.
కోజికోడ్, వాయనాడ్, ఇడుక్కి, మలప్పురం మరియు ఎర్నాకుళం జిల్లాల్లోని గబ్బిలాలలో నిపా యాంటీబాడీస్ కూడా గుర్తించారు.