ఇన్నేళ్లు పని చేయించుకున్నారు.. ఇప్పుడెలా తొలగిస్తారంటూ కేజీబీవీ టీచర్ల ఆందోళన
ఈ వార్తాకథనం ఏంటి
ఆంధ్రప్రదేశ్ లోని కస్తూర్బా గాంధీ బాలికల విద్యాలయాల్లో పనిచేస్తున్న పార్ట్ టైం పీజీటీలు, పీఆర్టీల తొలగింపుపై దుమారం రేగుతోంది.
తమను విధుల్లోంచి తొలగించడం ఏమిటని, వెంటనే విధుల్లోకి తీసుకోవాలని రాష్ట్ర వ్యాప్తంగా ఆందోళనకు దిగారు.
నియామకం సమయంలో తమకు ఇచ్చిన హామీలేవీ ప్రభుత్వం అమలు చేయట్లేదని టీచర్లు ఆరోపించారు. సెలవుల్లోనూ తమతో పని చేయించుకున్నారని ఆవేదన వ్యక్తం చేశారు.
352 కస్తూర్బా గాంధీ బాలికా విద్యాలయాల (కేజీబీవీ)లో దాదాపు 840 మంది పార్ట్ టైం, గెస్ట్ టీచర్లుగా పనిచేస్తున్నారు. గత 8 ఏళ్లుగా పనిచేస్తున్న వీరందరినీ ఉన్నపళంగా ప్రభుత్వం రోడ్డున పడేసిందని ఆగ్రం వ్యక్తం చేస్తున్నారు.
కొత్త నియామకాల పేరుతో తమను తొలగించడాన్ని ఖండించారు. కాంట్రాక్టు పద్ధతిలో మళ్లీ తమనే తీసుకోవాలని కోరుతున్నారు.
KGBV Part Time PGT Teachers
కొత్త పోస్టులకు లక్షలాది రూపాయలు చేతులు మారుతున్నాయని ఆరోపణలు
దీంతో కొత్త నియామకాల్లో తమను సర్దుబాటు చేయాలంటూ గురువారం టీచర్లు ఆందోళన చేశారు. విద్యార్హతలు, బోధనా సామర్థ్యం పరీక్షించాకే తమను ఉద్యోగాల్లోకి తీసుకున్నారని, ఇప్పుడు ఉద్యోగాల్లోంచి తీసేశారని ఆవేదన వ్యక్తం చేశారు.
కేజీబీవీల్లో ఇంటర్ బోధన కోసం, గతంలో నియమించిన తెలుగు, ఇంగ్లీష్ టీచర్లకు, పోస్టుల సర్దుబాటు పేరుతో ప్రభుత్వం తాజాగా ఉద్వాసన పలికింది.
కొత్తగా కాంట్రాక్టు పద్ధతి మేరకు 1,543 నియామకాలకు గత నెలలో నోటిఫికేషన్‌ సైతం జారీ అయ్యింది.
మరో వైపు కొత్త రిక్రూట్మెంట్ పేరుతో పోస్టులను అమ్ముకున్నారన్న ఆరోపణలు వస్తున్నాయి. పోస్టును బట్టి లక్షల రూపాయలు చేతులు మారుతున్నట్లు తెలుస్తోంది.
జిల్లాల్లో డెమో, నైపుణ్యాల పరిశీలనకు 15 మార్కుల వెయిటేజీ ఉండటంతో అధికారులు అవకతవకలకు పాల్పడుతున్నారన్న ఆరోపణలు వెల్లువెత్తుతున్నాయి.