మధ్యప్రదేశ్‌: భార్య, ఇద్దరు పిల్లలను గొడ్డలితో నరికి, ఇంట్లోనే పూడ్చిపెట్టాడు
మధ్యప్రదేశ్‌లోని రత్లామ్‌లో ఘోరం జరిగింది. ఓ వ్యక్తి తన భార్యతో పాటు ఇద్దరు పిల్లలను గొడ్డలితో దారుణంగా హత్య చేశాడు. పైగా వారి మృతదేహాలను ఇంట్లోనే పూడ్చిపెట్టాడు. ఈ దారుణం జరిగిన రెండు నెలల తర్వాత విషయం వెలుగులోకి వచ్చింది. ముగ్గురిని హత్య చేసిన తర్వాత నిందితుడు ఏం జరగనట్టు అందరితో సాధారణంగా వ్యవహరించాడు. రెండు నెలలుగా అతను ఒక్కడే కనపడటం, మిగతా కుటుంబ సభ్యులు కనపడకపోవడంతో స్థానికులకు అనుమానం వచ్చి పోలీసులకు సమాచారం ఇచ్చారు. ఈ మేరకు పోలీసులు కేసు నమోదు చేసుకొని విచారించడంతో అసలు విషయం వెలుగులోకి వచ్చింది.
కుటుంబ కలహాల కారణంగానే హత్యలు చేసినట్లు ఒప్పుకున్ననిందితులు
భార్య, పిల్లలను ఎందుకు హత్య చేశాడో నిందితుడు సోనూ తల్వాడే చెప్పినట్లు రత్లామ్ పోలీసు సూపరింటెండెంట్ అభిషేక్ తివారీ చెప్పారు. కుటుంబ కలహాల కారణంగానే భార్యతో పాటు ఏడేళ్ల కుమారుడు, నాలుగేళ్ల కూతురిని గొడ్డలితో హత్య చేసినట్లు నిందితుడు ఒప్పుకున్నట్లు ఆయన వెల్లడించారు. విచారణ తర్వాత మరిన్ని వివరాలు చెప్తామని ఆయన పేర్కొన్నారు. మృతదేహాలు నిందితుడి భార్య, ఇద్దరు పిల్లలవేనని నిర్ధారించుకోవడానికి డీఎన్‌ఏ పరీక్షల కోసం పంపినట్లు ఎస్పీ చెప్పారు. వైద్యులు, ఫోరెన్సిక్ నిపుణుల సమక్షంలో మృతదేహాలను వెలికితీసినట్లు వెల్లడించారు. ఇదిలా ఉండగా, మృతదేహాలను ఇంట్లో పూడ్చి పెట్టడానికి నిందితుడు సోనూ తల్వాడేకు మరో వ్యక్తి సాయం చేసినట్లు పోలీసులు గుర్తించారు. దీంతో అతడిని కూడా అరెస్టు చేశారు.
