Indian Railways: ఇండియన్ రైల్వే కీలక నిర్ణయం..వృద్ధుల కోసం ప్రత్యేక కంపార్ట్‌మెంట్లు ఏర్పాటు
ఈ వార్తాకథనం ఏంటి
భారత రైల్వే వ్యవస్థ ప్రపంచంలోనే నాలుగో అతిపెద్దదిగా గుర్తింపు పొందింది. దేశంలోనే అతిపెద్ద రవాణా వ్యవస్థగా పనిచేస్తూ, ప్రతిరోజూ లక్షలాది మంది ప్రజలకు ప్రయాణ సేవలు అందిస్తోంది. ప్రయాణికుల సౌకర్యాల కోసం రైల్వే శాఖ ఎప్పటికప్పుడు కొత్త చర్యలు తీసుకుంటూ ముందుకు సాగుతోంది. ఈ క్రమంలో వృద్ధులు, దివ్యాంగుల రాకపోకల కోసం మరింత మెరుగైన ఏర్పాట్లపై దృష్టి కేంద్రీకరించింది. తాజాగా ముంబై సబర్బన్ రైలు నెట్‌వర్క్‌లో వృద్ధుల ప్రయాణాన్ని మరింత సౌకర్యవంతంగా చేయాలనే ఉద్దేశంతో ప్రత్యేక కంపార్ట్‌మెంట్‌ ఏర్పాటు చేసి కొత్త ప్రయోగాన్ని ప్రారంభించింది.
వివరాలు
వృద్ధుల ప్రయాణానికి ప్రత్యేక కంపార్ట్‌మెంట్‌:
సీనియర్ సిటిజన్ల ప్రయాణాన్ని సులభతరం చేయాలన్న ఉద్దేశంతో ముంబై సబర్బన్ రైల్వే నెట్‌వర్క్‌లోని ఎలక్ట్రిక్ మల్టిపుల్ యూనిట్ (EMU) రైళ్లలో ప్రత్యేక కంపార్ట్‌మెంట్లు ఏర్పాటు చేయనున్నట్లు సెంట్రల్ రైల్వే ప్రకటించింది. రైల్వే బోర్డు నుంచి వచ్చిన ఆదేశాల ఆధారంగా ఈ నిర్ణయం తీసుకున్నట్లు స్పష్టం చేసింది. రద్దీ సమయాల్లో వయోజనులు క్షేమంగా, నిశ్చింతగా ప్రయాణించేందుకు ఈ చర్య తీసుకున్నట్లు వివరించింది. ఇది ప్రస్తుతం ప్రయోగాత్మకంగా చేపట్టిన పైలట్ ప్రాజెక్ట్‌ మాత్రమేనని, విజయవంతమైతే దేశవ్యాప్తంగా దశలవారీగా అమలు చేస్తామని అధికారులు పేర్కొన్నారు.
వివరాలు
ఆరో బోగీలో లగేజ్ వ్యాన్‌ను మారుస్తూ:
ముంబై వైపు నుంచి వచ్చే రైళ్లలో ఆరో బోగీలో ఉండే లగేజ్ వ్యాన్‌ను సీనియర్ సిటిజన్ల ప్రయాణానికి అనుకూలంగా మార్చారు. ఈ ప్రత్యేక కంపార్ట్‌మెంట్‌ను మాతుంగ వర్క్‌షాప్‌లో ప్రత్యేకంగా రూపొందించారు. వృద్ధులు సులభంగా రైలు ఎక్కేందుకు, దిగేందుకు అనువైన ఏర్పాట్లు ఇందులో ఉన్నాయి.
వివరాలు
మెరుగైన సీటింగ్, భద్రతా సదుపాయాలు:
ఈ ప్రత్యేక కంపార్ట్‌మెంట్‌లో వృద్ధులకు అనువైన సీటింగ్ వ్యవస్థను ఏర్పాటు చేశారు. ఇందులో మూడు సీట్ల బెంచీలు,రెండు సీట్ల బెంచీలు ఉంటాయి. మొత్తం 13 మంది వృద్ధులు కూర్చోగలిగే వీలుతో ఈ కంపార్ట్‌మెంట్‌ రూపొందించారు. రద్దీ సమయాల్లో వారికి ప్రశాంతంగా ప్రయాణించేందుకు ఇది దోహదపడుతుంది. కంపార్ట్‌మెంట్‌లో స్టెయిన్‌లెస్ స్టీల్ ట్యూబులర్ పార్టిషన్లు ఏర్పాటు చేశారు. వీటిలో ఐ లెవెల్ ప్యానెల్లు, పట్టుకోవడానికి గ్యాప్ ఉన్న గ్రాబ్ పోల్స్ ఉన్నాయి. రైలు కదులుతుంటే లేదా నిలబడి ఉన్నప్పుడు నిలిచుండే ప్రయాణికులకు వీటివల్ల బాగా సాయం అందుతుంది. అలాగే డోర్ వద్ద ఖర్నాల్ వర్టికల్ గ్రాబ్ పోల్స్ ఏర్పాటు చేశారు. అత్యవసర పరిస్థితుల్లో సురక్షితంగా బయటపడేందుకు డోర్ ఫ్రేమ్ కింద ఎమర్జెన్సీ నిచ్చెనలు కూడా అమర్చారు.