INDIA bloc protest: ఎంపీల సస్పెన్షన్‌కు వ్యతిరేకంగా నేడు భారత కూటమి దేశవ్యాప్త నిరసన
ఈ వార్తాకథనం ఏంటి
పార్లమెంట్ శీతాకాల సమావేశాల సందర్భంగా "అప్రజాస్వామిక పద్ధతిలో" పార్లమెంట్ నుండి చారిత్రాత్మక సంఖ్యలో MPలను సస్పెండ్ చేయడాన్ని నిరసిస్తూ ప్రతిపక్ష నేతృత్వంలోని ఇండియా కూటమి పిలుపు మేరకు ఇవాళ దేశవ్యాప్తంగా అన్ని రాష్ట్రాల్లో నిరసన కార్యక్రమాలు నిర్వహించనున్నట్లు వామపక్షాలు, కాంగ్రెస్‌, ఆమ్‌ఆద్మీ పార్టీలు ప్రకటించాయి.
ఢిల్లీలోని జంతర్‌మంతర్‌లో ఉదయం 11 గంటలకు కాంగ్రెస్‌ అధ్యక్షుడు మల్లికార్జున్‌ ఖర్గే,పార్టీ మాజీ అధ్యక్షుడు రాహుల్‌ గాంధీ,ఇతర కూటమి సభ్యులు ప్రసంగించనున్నారు.
ఇదిలావుండగా,అన్ని జిల్లా కేంద్రాల్లో దేశవ్యాప్తంగా నిరసన కార్యక్రమాలు కూడా నిర్వహించనున్నట్లు ఖర్గే తెలిపారు.
Details
రికార్డు స్థాయిలో 146 మంది పార్లమెంట్ సభ్యుల సస్పెన్షన్
డిసెంబరు 13న లోక్‌సభ గ్యాలరీలోకి కొందరు అగంతకులు సందర్శకులుగా ప్రవేశించి, పొగబాంబులు వదిలి అలజడి సృష్టించిన ఘటనలో భద్రతా వైఫల్యాలపై కేంద్ర హోం మంత్రి అమిత్ షా ప్రకటన చేయాలని ఎంపీలు డిమాండ్‌ చెయ్యడంతో లోక్‌సభ,రాజ్యసభ రెండింటిలోనూ సస్పెన్షన్‌ల పరంపర ఏర్పడింది.
అయితే, పార్లమెంట్ నుంచి రికార్డు స్థాయిలో 146 మంది పార్లమెంట్ సభ్యులను స్పీకర్ ఓంబిర్లా సస్పెండ్ చేశారు.
లోక్‌సభ స్పీకర్ ఓం బిర్లా, రాజ్యసభ ఛైర్మన్‌ జగదీప్‌ ధన్‌ఖర్‌ల చర్యకు నిరసనగా గురువారం సస్పెండ్ అయిన వారితో సహా ప్రతిపక్ష ఎంపీలు పార్లమెంట్ నుంచి విజయ్‌ చౌక్‌కు పాదయాత్ర నిర్వహించారు.
అంతకుముందు నిరసన సందర్భంగా, బీజేపీకి ప్రజాస్వామ్యంపై విశ్వాసం లేదని ఆరోపిస్తూ "ప్రజాస్వామ్యంగా ప్రవర్తించాలని" ఖర్గే ప్రభుత్వాన్ని కోరారు.