Child Safety in AP : బాలల భద్రతకు ఏపీ సర్కార్‌ కొత్త కార్యాచరణ.. రాష్ట్ర, జిల్లా స్థాయిలో ప్రత్యేక కమిటీలు
ఈ వార్తాకథనం ఏంటి
ఆంధ్రప్రదేశ్‌లో చిన్నారుల భద్రతను మరింత పటిష్టం చేసేందుకు సీఎం చంద్రబాబు నాయుడు నేతృత్వంలోని కూటమి ప్రభుత్వం ప్రత్యేక కార్యాచరణకు శ్రీకారం చుట్టింది. ఇందులో భాగంగా రాష్ట్రస్థాయిలో పర్యవేక్షక కమిటీని ఏర్పాటు చేస్తూ ఉత్తర్వులు జారీ చేసింది. మహిళా, శిశు సంక్షేమ శాఖ ముఖ్య కార్యదర్శి ఈ కమిటీకి ఛైర్‌పర్సన్‌గా వ్యవహరించనున్నారు.
వివరాలు
రాష్ట్రస్థాయిలో ఉన్నతాధికారులతో కమిటీ
ఈ కమిటీలో డీజీపీ, సీఐడీ, పోలీసు, విద్యా, కార్మిక, వైద్య ఆరోగ్య శాఖలకు చెందిన ఉన్నతాధికారులతో పాటు యాంటీ హ్యూమన్ ట్రాఫికింగ్ యూనిట్‌ ప్రతినిధులు సభ్యులుగా ఉంటారు.
చిన్నారులు అదృశ్యమైన సందర్భాల్లో వివిధ శాఖల మధ్య సమన్వయం ఉండేలా కమిటీ చర్యలు తీసుకుంటుంది.
ఆయా కేసుల దర్యాప్తు పురోగతిని ఎప్పటికప్పుడు సమీక్షిస్తూ.. అవసరమైన సూచనలు, సలహాలు అందిస్తుంది.
వివరాలు
జిల్లాల్లోనూ ప్రత్యేక పర్యవేక్షక కమిటీలు
రాష్ట్రస్థాయి కమిటీతో పాటు ప్రతి జిల్లాలోనూ ప్రత్యేక పర్యవేక్షక కమిటీలను ఏర్పాటు చేయనున్నారు. జిల్లా కలెక్టర్‌ ఈ కమిటీకి అధ్యక్షత వహిస్తారు.
ఎస్పీ లేదా పోలీస్‌ కమిషనర్‌ కో-ఛైర్‌పర్సన్‌గా వ్యవహరిస్తారు. జిల్లాల్లో పిల్లల అదృశ్యానికి సంబంధించిన సమస్యలను గుర్తించడం, కిడ్నాప్‌ కేసుల దర్యాప్తును వేగవంతం చేయడం ఈ కమిటీల ప్రధాన బాధ్యతగా ఉంటుంది.
ముఖ్యంగా బాలల అక్రమ రవాణా జరిగే అవకాశమున్న ప్రాంతాలపై ప్రత్యేక నిఘా పెట్టనున్నారు.
అనుమానాస్పద వ్యక్తులు, ముఠాల కదలికలను గుర్తించి.. తగిన చర్యలు తీసుకునేలా సంబంధిత శాఖలను అప్రమత్తం చేయనున్నారు.
వివరాలు
దత్తత పేరుతో పిల్లల విక్రయాలు.. అక్రమ రవాణాపై నిఘా
కొంతమంది పేద, అనాథ పిల్లలను దత్తత పేరుతో ఇతర రాష్ట్రాలకు తరలించి విక్రయిస్తున్నట్లు ఆరోపణలున్నాయి.
మరికొందరిని వెట్టి చాకిరీ, భిక్షాటన, ఇతర అసాంఘిక కార్యకలాపాలకు ఉపయోగిస్తున్న ఘటనలు వెలుగులోకి వస్తున్నాయి.
ఈ నేపథ్యంలో పిల్లలు అదృశ్యమైన తర్వాత వారిని వెతకడమే కాకుండా.. ఇలాంటి ఘటనలు చోటుచేసుకోకుండా ముందస్తు చర్యలు తీసుకోవాలని ప్రభుత్వం భావిస్తోంది.
కొత్తగా ఏర్పాటు చేయనున్న కమిటీల ద్వారా చిన్నారుల అదృశ్య కేసులపై నిరంతర పర్యవేక్షణ కొనసాగనుంది.
ఈ వ్యవస్థ సమర్థంగా అమలైతే తప్పిపోయిన పిల్లలను త్వరగా గుర్తించి వారి కుటుంబాలకు చేర్చడంతో పాటు, బాలల అక్రమ రవాణాకు అడ్డుకట్ట వేయవచ్చని ప్రభుత్వం ఆశిస్తోంది.
తద్వారా చిన్నారుల రక్షణకు మరింత పటిష్టమైన వ్యవస్థ అందుబాటులోకి రానుంది.