ఇద్దరు పిల్లలు ఉన్న వారికే ఓటు హక్కు; ఎమ్మెల్యే రాజాసింగ్ వివాదాస్పద వ్యాఖ్యలు
ఈ వార్తాకథనం ఏంటి
హైదరాబాద్‌లో జరిగిన శ్రీరామనవమి ర్యాలీలో వివాదాస్పద వ్యాఖ్యలు చేసినందుకు ఎమ్మెల్యే రాజా‌సింగ్‌పై పోలీసులు కేసు నమోదు చేశారు. అఫ్జల్‌గంజ్ పోలీసులు భారతీయ శిక్షాస్మృతి (ఐపీసీ ) సెక్షన్ 153-ఏ, 506 కింద అభియోగాలు మోపారు.
అఫ్జల్‌గంజ్ పోలీస్ స్టేషన్‌కు చెందిన ఎస్‌ఐ వీరబాబు ఇచ్చిన ఫిర్యాదు ఆధారంగా ఈ కేసు నమోదైంది.
గతంలో కూడా వివాదాస్ప వ్యాఖ్యల నేపథ్యంలో ఆయన్ను బీజేపీ నుంచి సస్పెండ్ చేశారు. ఈ క్రమంలో రాజా సింగ్‌ పాల్గొనే శ్రీరామనవమి ర్యాలీలో అల్లర్లు చెలరేగకుండా ఉండేందుకు పోలీసులు భారీ బందోబస్తును ఏర్పాటు చేశారు.
అందులో భాగంగా ఎస్‌ఐ వీరబాబుబును ఎస్ఏ బజార్ ప్రాంతంలో నియమించారు. ఈ క్రమంలో ఆయన పరిధిలోకి వచ్చాక రాజాసింగ్ వివాదాస్పద వ్యాఖ్యలు చేసినట్లు ఫిర్యాదులో పేర్కొన్నారు.
రాజాసింగ్
హిందూ దేశానికి రాజధాని దిల్లీ కాదు: రాజాసింగ్
శ్రీరాముడి శోభాయత్ర ఎస్ఏ బజార్‌కు చేరుకోగానే, ఏనుగుపై స్వారీ వచ్చిన రాజాసింగ్ హిందీలో ప్రసంగించినట్లు వీరబాబు పేర్కొన్నారు.
భారతదేశం హిందూ రాష్ట్రంగా మారితే ఇద్దరు పిల్లల విధానాన్ని అనుసరించే వారికి మాత్రమే ఓటు హక్కు కల్పించనున్నట్లు మరో వివాదానికి తెర లేపారు.
'మేము ఐదుగురం, మా 50మంది' విధానాన్ని అనుసరించే వారికి ఓటు వేయడానికి అనుమతించబడదని వివాదాస్పద వ్యాఖ్యలు చేశారు.
హిందూ దేశ రాజధాని దిల్లీ ఉండదని కాశీ లేదా మధుర లేదా అయోధ్యలను సాధువులు ఎంచుకుంటారన్నారు.
హిందూ రాష్ట్రం రైతులకు అనుకూలంగా పన్ను రహితంగా ఉంటుందని, అక్కడ గో హత్య, మతమార్పిడి ఉండదని అన్నారు.