Pahalgam Terror Attack: పహల్గాం ఉగ్రదాడి నేపథ్యంలో పాకిస్థాన్ ప్రభుత్వ ఎక్స్‌ ఖాతా భారత్‌లో నిలిపివేత
ఈ వార్తాకథనం ఏంటి
జమ్ముకశ్మీర్‌లోని పహల్గాంలో పర్యాటకులపై జరిగిన ఉగ్రదాడి నేపథ్యంలో భారత్-పాకిస్థాన్ సంబంధాల్లో ఉద్రిక్తతలు పెరిగాయి.
ఈ దాడి నేపథ్యంలో న్యూఢిల్లీలో కేంద్ర ప్రభుత్వం కీలక దౌత్య చర్యలు తీసుకుంది.
అందులో భాగంగానే తాజాగా మరో గంభీర పరిణామం చోటుచేసుకుంది.
పాకిస్థాన్ ప్రభుత్వానికి చెందిన అధికారిక 'ఎక్స్‌' ఖాతాను (Pakistan Government X Account) భారత్‌లో నిలిపివేశారు.
ప్రస్తుత పరిణామాల దృష్ట్యా, ఈ ఖాతా వల్ల దేశ భద్రతకు ముప్పు ఏర్పడవచ్చని భావించిన కేంద్ర ఎలక్ట్రానిక్స్‌, ఐటీ మంత్రిత్వ శాఖ, సామాజిక మాధ్యమ వేదిక 'ఎక్స్‌'ను సంప్రదించి, భారత భూభాగంలో పాకిస్థాన్ ప్రభుత్వ ఖాతాను నిలిపివేయాలని విజ్ఞప్తి చేసింది.
వివరాలు
పాకిస్థాన్‌కి గట్టి హెచ్చరిక జారీ
ఈ విజ్ఞప్తిని అంగీకరించిన 'ఎక్స్‌' సంస్థ, ఆ ఖాతాను భారత్‌లో నిలిపివేసింది. దీంతో ఇకపై భారత యూజర్లు ఆ ఖాతాలో ఉన్న కంటెంట్‌ను చూడలేరు.
ఈ క్రమంలో, పహల్గాం దాడికి స్పందనగా ప్రధాని నరేంద్ర మోదీ అధ్యక్షతన బుధవారం భద్రతా వ్యవహారాలపై కేంద్ర క్యాబినెట్ కమిటీ (సీసీఎస్‌) అత్యవసరంగా సమావేశమైంది.
ఈ సమావేశంలో పాకిస్థాన్‌కి గట్టి హెచ్చరిక జారీచేయాలని నిర్ణయించారు.
ఆ దేశం తన భూభాగాన్ని ఉగ్రవాద కార్యకలాపాలకు ఉపయోగించనివ్వకుండా చర్యలు తీసుకునే వరకూ, భారత్ కఠిన వైఖరి కొనసాగిస్తుందని స్పష్టం చేశారు.
వివరాలు
వారం రోజుల్లోగా దేశాన్ని విడిచి పెట్టండి
ఈ నిర్ణయాల సందర్భంగా సింధూ నదీ జలాల ఒప్పందం అమలును తాత్కాలికంగా నిలిపివేస్తున్నట్టు ప్రకటించారు.
అంతేకాక, ఇరు దేశాల మధ్య ఉన్న అటారీ సరిహద్దు గేటును కూడా తాత్కాలికంగా మూసివేశారు.
భారత్‌లోని పాకిస్థాన్ రాయబార కార్యాలయాల్లో పనిచేస్తున్న ఆ దేశ సైనిక సిబ్బంది, అధికారులు ఇకపై అవాంఛిత వ్యక్తులుగా గుర్తించి, వారందరికీ వారం రోజుల్లోగా దేశాన్ని విడిచిపెట్టాలని స్పష్టం చేసింది కేంద్రం.