Pm Modi: ప్రతికూల వాతావరణం కారణంగా ప్రధాని సిక్కిం పర్యటన రద్దు.. బాగ్డోగ్రాలో వర్చువల్‌గా ప్రసంగం
ఈ వార్తాకథనం ఏంటి
పహల్గామ్‌లో జరిగిన ఉగ్రదాడి వెనుక భారతీయులను విభజించాలనే ఉద్దేశంతో ముష్కరులు కుట్ర పన్నారని, అయితే వారికి భారత్‌ తగిన ప్రతిస్పందనను ఇచ్చిందని ప్రధానమంత్రి నరేంద్ర మోదీ వ్యాఖ్యానించారు.
ఈ దాడి జరిగిన తరువాత దేశ ప్రజలు అనేక రకాల భిన్నతల మధ్య ఉన్నా, మునుపెన్నడూ లేనంతగా ఐక్యతను ప్రదర్శించారని ఆయన అన్నారు.
పహల్గామ్‌ దాడి కేవలం భారతీయులపై చేసిన దాడి మాత్రమే కాకుండా, ఇది మానవత్వం, సోదరభావనలపై జరిగిన దాడిగా ఆయన అభివర్ణించారు.
అయితే 'ఆపరేషన్‌ సిందూర్‌' ద్వారా మన భద్రతా దళాలు ధైర్యంగా ఎదురొడి, పటిష్టమైన బదులిచ్చాయని మోదీ తెలిపారు.
ఆయన పశ్చిమ బెంగాల్‌లోని బాగ్డోగ్రా నుండి వర్చువల్‌ విధానంలో ప్రసంగిస్తూ ఈ విషయాలు వెల్లడించారు.
వివరాలు
వాతావరణ సమస్యలతో సిక్కిం పర్యటన రద్దు
ఈరోజు (గురువారం) ప్రధాని మోదీ సిక్కిం వెళ్లాల్సి ఉన్నా, వాతావరణ పరిస్థితులు అనుకూలించకపోవడంతో పర్యటనను రద్దు చేయాల్సి వచ్చింది.
సిక్కిం రాష్ట్ర అవతరణ 50వ వార్షికోత్సవ వేడుకల్లో పాల్గొనాల్సి ఉన్న ప్రధాని, గ్యాంగ్‌టక్‌ చేరుకొని దాదాపు రూ. 750 కోట్ల విలువైన పలు అభివృద్ధి పనులకు శ్రీకారం చుట్టాల్సి ఉండేది.
కానీ వర్షాలు, ప్రతికూల వాతావరణం కారణంగా ఈ పర్యటన రద్దయింది. దీంతో బాగ్డోగ్రా నుండి వీడియో కాన్ఫరెన్స్‌ ద్వారా ఆయన ప్రజలను ఉద్దేశించి ప్రసంగించారు.
వివరాలు
ప్రజాస్వామ్య యాత్రలో సిక్కిం స్వర్ణోత్సవం
ఈ సందర్భంగా ప్రధాని మోదీ మాట్లాడుతూ.. సిక్కిం ప్రజాస్వామ్య ప్రయాణం 50 సంవత్సరాలు పూర్తి చేసుకున్న ఈ రోజు సువర్ణోత్సవ దినంగా భావిస్తున్నానని తెలిపారు.
తాను వ్యక్తిగతంగా రాష్ట్ర ప్రజల మధ్య ఉండాలని ఆశించినా, ఢిల్లీ నుంచి బాగ్డోగ్రా వరకు వచ్చాక వాతావరణం తనను సిక్కింకు వెళ్లనివ్వలేదని పేర్కొన్నారు. దీంతో అక్కడి ప్రజలను ప్రత్యక్షంగా కలవలేకపోయానని విచారం వ్యక్తం చేశారు.
వివరాలు
అభినందనలు, అభివృద్ధిపై ప్రధాని అభిప్రాయాలు
సిక్కిం పథకం విజయవంతంగా నిర్వహించేందుకు ముఖ్యమంత్రి చేసిన కృషిని ప్రధాని కొనియాడారు.
రాష్ట్ర ప్రజలకు 50వ వార్షికోత్సవం సందర్భంగా తన శుభాకాంక్షలు తెలిపారు.
50 ఏళ్ల క్రితం సిక్కిం ప్రజలు తమ ప్రజాస్వామ్య భవిష్యత్తు దిశను నిర్ణయించుకోవాలని నిర్ణయించుకుని భారతదేశంతో కలవాలని కోరుకున్నారన్నారు.
ఈ రోజు సిక్కింలో ప్రతి కుటుంబం అభివృద్ధి మార్గంలో ఉందని తెలిపారు.
సిక్కిం మొత్తం సేంద్రీయ వ్యవసాయాన్ని స్వీకరించిన రాష్ట్రంగా పేరొందిందని, అది సాంస్కృతిక మరియు వారసత్వ విలువల ప్రతీకగా ఎదిగిందని చెప్పారు.
వివరాలు
ఈశాన్య అభివృద్ధికి కేంద్ర బిందువుగా..
2014లో తమ ప్రభుత్వం అధికారంలోకి వచ్చిన తర్వాత "సబ్‌ కా సాత్‌, సబ్‌ కా వికాస్‌" అనే నినాదంతో ముందుకెళ్లామని మోదీ గుర్తుచేశారు.
ఇదే దిశగా ఈశాన్య రాష్ట్రాలను అభివృద్ధి కేంద్రముగా మార్చే ప్రయత్నం చేశామని తెలిపారు.
ఈ రోజు సిక్కింలో పలు ప్రాజెక్టులకు శంకుస్థాపన చేయడం, ప్రారంభించడం ద్వారా నవ భారత నిర్మాణంలో ఒక కొత్త అధ్యాయాన్ని ప్రారంభించినట్లు ఆయన వెల్లడించారు.