PM Modi: బ్రిక్స్‌లో పాకిస్తాన్‌పై తీవ్ర విమర్శలు చేసిన ప్రధాని మోదీ
ఈ వార్తాకథనం ఏంటి
బ్రెజిల్‌లోని రియో డి జనీరో నగరంలో నిర్వహించిన బ్రిక్స్ శిఖరాగ్ర సమావేశంలో భారత ప్రధాని నరేంద్ర మోదీ ఉగ్రవాదంపై ఘాటుగా స్పందించారు. ఉగ్రవాదానికి మద్దతు ఇచ్చే పాకిస్థాన్‌పై తీవ్ర స్థాయిలో విమర్శలు గుప్పించారు. భారతదేశం ఉగ్రవాద బాధిత దేశమని, పాకిస్థాన్ మాత్రం దానికి ప్రోత్సాహకుడిగా వ్యవహరిస్తోందని స్పష్టం చేశారు. బాధితులను, మద్దతుదారులను ఒకే విధంగా చూడటం సరికాదని ఆయన పేర్కొన్నారు. పహల్గామ్‌లో జరిగిన ఉగ్రవాద దాడిని ఖండించిన అంతర్జాతీయ సముదాయానికి ప్రధాని మోడీ కృతజ్ఞతలు తెలిపారు. ఉగ్రదాడులను ప్రశ్నించకుండా మౌనంగా ఉండటం కూడా సమర్థనీయం కాదని ఆయన హెచ్చరించారు. వ్యక్తిగతంగా అయినా, రాజకీయ ప్రయోజనాల కోసం అయినా ఉగ్రవాదాన్ని ప్రోత్సహించే వారి గురించి పరోక్షంగా వ్యాఖ్యానించారు.
వివరాలు
మానవత్వంపై జరిగిన దారుణమైన చర్య: మోదీ
పాకిస్థాన్ తన భూభాగాన్ని ఉగ్రవాదులకు ఆశ్రయంగా మార్చిందన్న విషయాన్ని భారత్ స్పష్టమైన ఆధారాలతో ప్రపంచానికి చూపించిందని తెలిపారు. పహల్గామ్ దాడిని మానవత్వంపై జరిగిన దారుణమైన చర్యగా మోడీ పేర్కొన్నారు. ఇది పిరికితనంతో కూడిన అమానుష ఉగ్రదాడిగా అభివర్ణించారు. ఉగ్రవాదాన్ని ఎదుర్కొనడంలో ప్రపంచ దేశాలన్నీ ఐక్యంగా ముందుకు రావాల్సిన అవసరాన్ని ఆయన పునరుద్ఘాటించారు. మహాత్మా గాంధీ, గౌతమ బుద్ధుల శాంతి బోధనలు భారతదేశానికి మార్గదర్శకాలు కాగా, ఎంతటి క్లిష్ట పరిస్థితులున్నా దేశం శాంతిపథాన్నే అనుసరిస్తుందని ప్రధాని స్పష్టం చేశారు. మానవాళి సంక్షేమానికి శాంతి మార్గమే శాశ్వతమని చెప్పారు.
వివరాలు
పహల్గామ్ ఉగ్రదాడిని ఖండించిన బ్రిక్స్ గ్రూప్ నాయకులు
2026లో జరగనున్న బ్రిక్స్ శిఖరాగ్ర సమావేశానికి భారతదేశమే ఆతిథ్యమివ్వనున్నట్లు సమాచారం. ఇక పహల్గామ్ ఉగ్రవాద దాడిపై బ్రిక్స్ దేశాల నాయకులు ఒక్కసారిగా స్పందించారు. రియో డి జనీరో డిక్లరేషన్‌లో విడుదల చేసిన ఉమ్మడి ప్రకటనలో దాడిని "నేరపూరితమైనదిగా, అన్యాయమైనదిగా" ఖండించారు. "2025 ఏప్రిల్ 22న జమ్మూ కాశ్మీర్‌లో జరిగిన ఉగ్రవాద దాడిని మేము తీవ్రంగా ఖండిస్తున్నాం. ఈ దాడిలో 26 మంది ప్రాణాలు కోల్పోయారు, అనేక మంది గాయపడ్డారు. సరిహద్దుల్లో ఉగ్రవాద చొరబాటు, నిధుల సమకూర్పు, రక్షణ గల ఆశ్రయ కేంద్రీకరణ వంటి అన్ని రూపాల్లో ఉగ్రవాదాన్ని అరికట్టేందుకు మా నిబద్ధతను మేము పునరుద్ఘాటిస్తున్నాం" అని పాకిస్థాన్ పేరు ప్రస్తావించకుండా ఉమ్మడి ప్రకటనలో పేర్కొంది.