PM modi: ప్రధాని మోదీ 'స్నార్కెలింగ్‌'.. లక్షద్వీప్‌లో బీచ్‌లో సందడి
ప్రధానమంత్రి నరేంద్ర మోదీ బుధవారం లక్షద్వీప్‌లో పర్యటించారు. ఈ సందర్భంగా స్నార్కెలింగ్‌ కూడా చేశారు. అంతేకాకుండా స్నార్కెలింగ్‌కు వెళ్లినప్పుడు సముద్ర గర్భంలోని పగడపు దిబ్బలు, సముద్ర జీవరాశులను వీక్షించడమే కాకుండా ఇందుకు సంబంధించిన ఫొటోలను గురువారం ప్రధాని తన 'X' ఖాతాలో పంచుకున్నారు. తన పర్యటన గురించి X లో ఆయన ప్రస్తావించారు.''లక్షదీవుల అందం, అక్కడి ప్రజల మమకారం చూసి నేనింకా సంభ్రమాశ్చర్యంలోనే ఉన్నా. ప్రకృతి సౌందర్యం,ప్రశాంతమైన వాతావరణంతో ఈ దీవులు మనల్ని మంత్రముగ్ధులను చేస్తున్నాయి. 140 కోట్ల భారతీయుల సంక్షేమం కోసం మరింత కష్టపడి ఎలా పని చేయాలో ఈ వాతావరణం నాకు ఈ అవకాశాన్ని ఇచ్చిందని అన్నారు. సాహసాలు చేయాలనుకునేవారు.. మీ లిస్ట్‌లో లక్షద్వీప్‌ను కూడా చేర్చుకోండి'' అని మోదీ రాసుకొచ్చారు.
లక్షద్వీప్ లో రూ.1,150 కోట్ల అభివృద్ధి కార్యక్రమాలకు శ్రీకారం
లక్షద్వీప్ పర్యటనలో భాగంగా ప్రధాని మోదీ రూ.1,150 కోట్లకు పైగా విలువైన అభివృద్ధి కార్యక్రమాలను ప్రారంభించారు. అగట్టి, బంగారం, కవరత్తి వాసులతో తాను సంభాషించానని, వారి ఆతిథ్యానికి కృతజ్ఞతలు తెలియజేసినట్లు ప్రధాన మంత్రి తెలిపారు. లక్షద్వీప్‌పై కేంద్ర ప్రభుత్వం దృష్టి కేంద్రీకరించడం ద్వారా మెరుగైన అభివృద్ధి ద్వారా జీవితాలనుమెరుగుపరచడమే కాకుండా, మెరుగైన ఆరోగ్య సంరక్షణ, వేగవంతమైన ఇంటర్నెట్, త్రాగునీటికి అవకాశాలను కలిగిస్తుందన్నారు. అలాగే స్థానిక సంస్కృతిని సంరక్షించాలన్నారు. ఆయన ప్రారంభించిన ప్రాజెక్టులు ఈ స్ఫూర్తిని ప్రతిబింబిస్తున్నాయని ప్రధాని మోదీ అన్నారు.
