Heavy rains: తెలంగాణలో రెయిన్ అలర్ట్ జారీ.. ఇవాళ, రేపు భారీ వర్షాలు కురిసే అవకాశం
ఈ వార్తాకథనం ఏంటి
తెలంగాణలో వాతావరణం ఉత్కంఠ భరితంగా మారుతోంది. నైరుతి రుతుపవనాల ప్రభావంతో రాష్ట్రంలో ఇప్పటికే పలు జిల్లాల్లో వర్షాలు కురుస్తుండగా, ముందువార్తలు మరింత కలవరపెడుతున్నాయి. హైదరాబాద్ వాతావరణ కేంద్రం తాజా ప్రకారం, వచ్చే నాలుగు రోజులు తేలికపాటి నుంచి భారీ వర్షాలు కురిసే అవకాశం ఉన్నట్లు తెలిపింది. ఇవాళ కరీంనగర్, పెద్దపల్లి, భూపాలపల్లి, వరంగల్, సిద్ధిపేట, వికారాబాద్, సంగారెడ్డి, మెదక్, కామారెడ్డి జిల్లాల్లో ఈదురుగాలులతో కూడిన వర్షాలు కురిసే అవకాశముందని అంచనా వేసింది. గంటకు 30 నుంచి 40 కిలోమీటర్ల వేగంతో గాలులు వీస్తాయని పేర్కొంది.
Details
పలు జిల్లాలకు ఎల్లో అలర్ట్ జారీ
ఈ జిల్లాల్లో ఎల్లో అలర్ట్ ప్రకటించగా, ప్రజలు అప్రమత్తంగా ఉండాలని అధికారులు సూచిస్తున్నారు. ఉమ్మడి మహబూబ్‌నగర్, భద్రాద్రి కొత్తగూడెం జిల్లాల్లో ఈ రోజు, రేపు వర్షపాతం తీవ్రంగా ఉండే సూచనలున్నాయి. మరోవైపు, రాష్ట్ర రాజధాని హైదరాబాద్‌లో వాతావరణం ఇప్పటికే చల్లబడింది. మేఘావృతమై ఉన్న నగరంలో పలు ప్రాంతాల్లో ఉరుములు, మెరుపులతో కూడిన తేలికపాటి వర్షాలు కురిసే అవకాశం ఉందని వాతావరణ శాఖ స్పష్టం చేసింది. జూన్ 4 నుంచి 7వ తేదీ వరకు రాష్ట్రవ్యాప్తంగా తేలికపాటి నుంచి మోస్తరు వర్షాలు కురిసే అవకాశముందని హెచ్చరికలు వెల్లువెత్తుతున్నాయి. ప్రజలు అవసరమైన ముందస్తు జాగ్రత్తలు తీసుకోవాలని వాతావరణ శాఖ అధికారులు సూచిస్తున్నారు.