Telangana: తెలంగాణలో మూడు రోజులు మోస్తరు నుంచి భారీ వర్షాలు.. వెల్లడించిన హైదరాబాద్ వాతావరణ కేంద్రం
ఈ వార్తాకథనం ఏంటి
తెలంగాణలో వచ్చే మూడు రోజులు మోస్తరు నుంచి భారీ వర్షాలు కురిసే అవకాశం ఉందని హైదరాబాద్‌లోని వాతావరణ శాఖ కేంద్రం తెలిపింది. రాష్ట్రవ్యాప్తంగా నైరుతి రుతుపవనాల ప్రభావం బలపడుతుండటంతో, వర్షాల తీవ్రత పెరిగే సూచనలు కనిపిస్తున్నాయని పేర్కొంది. ప్రస్తుతం బంగాళాఖాతంలో ఉపరితల ఆవర్తనం కొనసాగుతోందని, దాని ప్రభావంతో రాష్ట్రంలోని అనేక జిల్లాల్లో భారీ వర్షాలు కురిసే అవకాశం ఉందని వాతావరణ శాఖ స్పష్టం చేసింది. ఈ వర్షాలు ఉరుములు, మెరుపులతో కూడి ఉండే అవకాశముందని, అదే సమయంలో గంటకు 30 నుంచి 40 కిలోమీటర్ల వేగంతో ఈదురుగాలులు వేయగలవని హైదరాబాద్ వాతావరణ కేంద్రం హెచ్చరించింది.
వివరాలు
ఈ జిల్లాలకు ఎల్లో అలర్ట్
ఈరోజు (సోమవారం) ఆసిఫాబాద్, మంచిర్యాల, నిజామాబాద్, పెద్దపల్లి, జయశంకర్ భూపాలపల్లి, ములుగు, భద్రాద్రి కొత్తగూడెం, మహబూబాబాద్, వరంగల్, హన్మకొండ జిల్లాల్లో బలమైన ఈదురుగాలులతో కూడిన వర్షాలు పడే అవకాశం ఉందని అధికారులు అంచనా వేశారు. రేపు (మంగళవారం) పెద్దపల్లి, భూపాలపల్లి, ములుగు, కొత్తగూడెం, సూర్యాపేట, మహబూబాబాద్, వరంగల్, హన్మకొండ జిల్లాల్లో కూడా ఇదే విధంగా ఈదురుగాలులతో కూడిన వర్షాలు కురిసే అవకాశం ఉందని వాతావరణ శాఖ తెలిపింది. ఈ నేపథ్యంలో, సంబంధిత జిల్లాలకు ఎల్లో అలర్ట్ కూడా జారీ చేసినట్లు వెల్లడించింది.