Andhra Pradesh: ఆంధ్రప్రదేశ్‌లో రూ.100తో వారసత్వ భూముల రిజిస్ట్రేషన్.. త్వరలో గ్రామ/వార్డు సచివాలయాల్లో ప్రారంభం
ఈ వార్తాకథనం ఏంటి
ఆంధ్రప్రదేశ్ రాష్ట్ర ప్రభుత్వం గ్రామ/వార్డు సచివాలయాల్లో వారసత్వ భూముల సంక్రమణ (సక్సెషన్) రిజిస్ట్రేషన్ ప్రక్రియను నామమాత్రపు ఫీజుతో ప్రారంభించేందుకు సిద్ధమవుతోంది. సబ్‌రిజిస్ట్రార్ కార్యాలయం నిర్దేశించిన మార్కెట్ విలువల ప్రకారం, ఆస్తి విలువ రూ.10 లక్షల లోపు ఉంటే రూ.100, దాని కంటే ఎక్కువైతే రూ.1,000 స్టాంపు డ్యూటీగా వసూలు చేయనున్నారు. ఈ రిజిస్ట్రేషన్‌లు యజమాని మృతిపట్ల వారసులకు సంక్రమించే భూములకు మాత్రమే గ్రామ/వార్డు సచివాలయాల్లో జరిగేలా ఏర్పాటు చేస్తున్నారు. ఇతర భూముల రిజిస్ట్రేషన్‌లు మునుపటిలానే సబ్‌రిజిస్ట్రార్ కార్యాలయాల ద్వారానే నిర్వహిస్తారు.
వివరాలు
55,000 ఫిర్యాదులు నమోదు
ప్రస్తుతం తల్లిదండ్రులు మరణించిన అనంతరం వారసులు తమకు వచ్చిన ఆస్తిని తహసీల్దార్‌కు దరఖాస్తు చేసి, కేవలం కాగితాలపై రాసుకుంటున్నారు. అయితే వీటికి మ్యుటేషన్‌లు సకాలంలో జరగకపోవడం, తహసీల్దారు కార్యాలయాల సిబ్బంది పదేపదే తిప్పుతున్నారన్న ఫిర్యాదులు ప్రభుత్వానికి అందుతున్నాయి. గత ఏడాది ఇదే అంశంపై సుమారు 55,000 ఫిర్యాదులు నమోదయ్యాయి. అంతేకాక కొందరు భూమి రిజిస్ట్రేషన్ అవసరం లేదనే భావనతో నిర్లక్ష్యం చూపుతున్నారు. దీని వల్ల చనిపోయిన వారి పేర్లు భూముల రికార్డుల్లో అలాగే మిగిలిపోతున్నాయి. దీని ఫలితంగా భవిష్యత్‌లో అనేక సమస్యలు తలెత్తుతున్నాయి.
వివరాలు
మరింత సులువు..
ప్రస్తుతం గ్రామ/వార్డు సచివాలయాల ద్వారా మరణ ధృవీకరణ పత్రాలు,కుటుంబ సభ్యుల సర్టిఫికెట్లు జారీ అవుతున్నాయి. భూమి యజమాని మరణించిన తర్వాత వారసులు లిఖితపూర్వక ఏకాభిప్రాయంతో ఆస్తిని భాగస్వామ్యం చేసుకుంటే, అక్కడి డిజిటల్ అసిస్టెంట్ ద్వారా నామమాత్రపు ఫీజుతో రిజిస్ట్రేషన్‌ను పూర్తి చేయవచ్చు. ఈ విధానం వల్ల ప్రజలు ముందుకు వచ్చి రిజిస్ట్రేషన్ చేయించుకునే అవకాశాలు పెరుగుతాయని అంచనా వేస్తున్నారు. ఈ రిజిస్ట్రేషన్ పూర్తి అయిన వెంటనే భూముల రికార్డుల్లో మ్యూటేషన్ ప్రక్రియ ఆటోమేటిక్‌గా జరిగి, వారసుల పేరుతో ఈ-పాస్‌బుక్ జారీ అవుతుంది. అలాగే వారసుల ఈ-కేవైసీ కూడా తీసుకుంటారు.
వివరాలు
రిజిస్ట్రేషన్ విధానంపై డిజిటల్ అసిస్టెంట్లకు శిక్షణ
ఇటీవల ముఖ్యమంత్రి చంద్రబాబు నాయుడు నిర్వహించిన సమీక్షా సమావేశంలో ఇచ్చిన ఆదేశాల మేరకు రెవెన్యూ శాఖ ఈ విధానం అమలుపై ప్రత్యేక మార్గదర్శకాలు రూపొందించనుంది. ఆ మార్గదర్శకాల ప్రకారం రిజిస్ట్రేషన్,స్టాంపుల శాఖ తగిన చర్యలు చేపడుతుంది. ఈ మొత్తం ప్రక్రియ అమలుకు కనీసం రెండు నుంచి మూడు నెలల సమయం పడే అవకాశం ఉంది. గత వైఎస్సార్‌సీపీ ప్రభుత్వ హయాంలో గ్రామ/వార్డు సచివాలయాల్లో అనాలోచితంగా ప్రవేశపెట్టిన దస్తావేజుల రిజిస్ట్రేషన్ పద్ధతి గందరగోళానికి కారణమైంది. తాజా మార్గదర్శకాల ప్రకారం ఇకపై కేవలం వారసత్వ భూములకే రిజిస్ట్రేషన్ పరిమితం చేస్తారు. ఈ ప్రక్రియ స్థానిక సబ్‌రిజిస్ట్రార్ కార్యాలయాల పర్యవేక్షణలో జరుగుతుంది. రిజిస్ట్రేషన్ విధానం ఎలా నిర్వహించాలో డిజిటల్ అసిస్టెంట్లకు త్వరలో మరొక విడత శిక్షణ ఇవ్వనున్నారు.