Manipur Violence: మణిపూర్‌లో హింసాకాండ.. 13 రోజుల విరామం తర్వాత నేటి నుండి పాఠశాలలు, కళాశాలలు రీఓపెన్
మణిపూర్‌లో జాతుల మధ్య ఉత్పన్నమైన వైరాన్ని తగ్గించి శాంతిని నెలకొల్పేందుకు కేంద్ర ప్రభుత్వం విస్తృతమైన ప్రయత్నాలు చేస్తున్నది. ఈ క్రమంలో ఆ రాష్ట్రంలో భారీ స్థాయిలో సైనికులను మోహరించారు. హింసాత్మక ఘటనల కారణంగా గత 13 రోజులుగా మూసివేసిన ఇంపాల్, జిరిబామ్ జిల్లాల్లోని పాఠశాలలు, కళాశాలలు ఈరోజు (నవంబర్ 29) నుంచి మళ్లీ ప్రారంభమవుతాయని డైరెక్టరేట్ ఆఫ్ ఎడ్యుకేషన్ ఒక అధికారిక ప్రకటనలో పేర్కొంది. అలాగే, ప్రభుత్వ, ఎయిడెడ్ కళాశాలలు, రాష్ట్ర విశ్వవిద్యాలయాలు కూడా ఈరోజు నుంచి తిరిగి పని ప్రారంభిస్తాయని ఉన్నత విద్య, సాంకేతిక విద్యా శాఖ స్పష్టం చేసింది.
తొమ్మిది జిల్లాల్లో మొబైల్ ఇంటర్నెట్ సేవల బంద్
అంతేకాక, జిరిబామ్ జిల్లాలో ముగ్గురు చిన్నారులు, ముగ్గురు మహిళల మృతదేహాలు బయటపడిన తర్వాత నవంబర్ 16న మణిపూర్‌లో అనేక జిల్లాల్లో హింసాత్మక ఘటనలు చోటుచేసుకున్నాయి. ఈ పరిస్థితుల్లో ఆరు జిల్లాల్లో జిల్లా మేజిస్ట్రేట్‌లు కర్ఫ్యూ అమలు చేశారు. అయితే, పాఠశాలలు, కళాశాలలు తిరిగి ప్రారంభమవుతుండటంతో అధికారులు కర్ఫ్యూను కొంత సడలించారు. అదనంగా, హింసాత్మక పరిస్థితుల కారణంగా ఇంఫాల్ వెస్ట్, ఇంఫాల్ ఈస్ట్, బిష్ణుపూర్, తౌబల్, కక్చింగ్, కాంగ్‌పోక్పి, చురచంద్‌పూర్, జిరిబామ్, ఫెర్జాల్ వంటి తొమ్మిది జిల్లాల్లో మొబైల్ ఇంటర్నెట్ సేవలను మరో రెండు రోజులు నిలిపివేయాలని నిర్ణయించారు.
