సెప్టెంబర్ 17పై బీఆర్ఎస్ కీలక నిర్ణయం.. జాతీయ సమైక్యతా దినోత్సవంగా నిర్వహిస్తామని ప్రకటన
ఈ వార్తాకథనం ఏంటి
సెప్టెంబర్ 17న జాతీయ సమైక్యతా దినోత్సవాన్ని నిర్వహించనున్నట్లు బీఆర్ఎస్ పార్టీ ప్రకటించింది. ఈ మేరకు రాష్ట్ర వ్యాప్తంగా గులాబీ శ్రేణులు 17న జాతీయ సమైక్యతా దినోత్సవంలో పాల్గొనాలని ఆ పార్టీ వర్కింగ్‌ ప్రెసిడెంట్‌, మంత్రి కేటీఆర్ పిలుపునిచ్చారు.
ఇప్పటికే సెప్టెంబర్ 17న సికింద్రాబాద్ పరేడ్ గ్రౌండ్స్ లో బీజేపీ విమోచన దినం పేరిట భారీ బహిరంగ సభకు రెడీ అవుతోంది. దీనికి కేంద్రహోంమంత్రి అమిత్ షా ముఖ్యఅతిథిగా రానున్నారు.
మరోవైపు అదే తేదీన హైదరాబాద్‌లో సీడబ్ల్యూసీ సమావేశాలు జరగనున్నాయి. సోనియాగాంధీ ఆధ్వర్యంలో భారీ ర్యాలీ తీయనున్నారు.
విమోచన దినోత్సవంపై నిర్ణయం చెప్పాలని బీజేపీ రాష్ట్ర అధ్యక్షుడు కిషన్ రెడ్డి ప్రభుత్వాన్ని నిలదీశారు. ఈ క్రమంలోనే మంత్రి కేటీఆర్ సమైక్యతా రాగం అందుకున్నారు.
DETAILS
జాతీయ సమైక్యతకు ప్రతీక : మంత్రి కేటీఆర్
1948 సెప్టెంబర్ 17న భారతంలో తెలంగాణ అంతర్భాగంగా మారిపోయిన రోజని మంత్రి కేటీఆర్ అన్నారు. నిజాం రాచరిక పరిపాలన నుంచి తెలంగాణ(హైదరాబాద్ రాష్ట్రం) ప్రజాస్వామ్యంలోకి మార్పు చెందన రోజని గుర్తు చేశారు.
జాతీయ సమైక్యతకు ప్రతీకగా నిలిచే సెప్టెంబర్ 17ను, రాజకీయాల కోసం వక్రీకరించి, స్వార్థ ప్రయోజనాలను వాడుకోవాలని చూస్తున్నారన్నారు. అవకాశవాద రాజకీయాలతో తెలంగాణ చరిత్రను మార్చి, మలినం చేసేందుకు యత్నిస్తున్నట్లు చెప్పారు.
విచ్ఛిన్నకర శక్తుల కుట్రలను తిప్పికొట్టాలని మంత్రి కేటీఆర్ పార్టీ శ్రేణులతో పాటు ప్రజలను కోరారు. తెలంగాణ ఏర్పడ్డాక గత 10 ఏళ్లలో అభివృద్ధి, సంక్షేమ కార్యక్రమాలను జోడెడ్లుగా పరిగెత్తిస్తున్నామని వివరించారు.