Supreme Court: వాళ్లకి ఆధార్ ఉన్నంత మాత్రాన ఓటు హక్కు ఇవ్వాలా? : సుప్రీంకోర్టు
ఈ వార్తాకథనం ఏంటి
దేశంలో అక్రమంగా ప్రవేశించిన వ్యక్తులు కూడా ఆధార్ కార్డు పొందుతున్న సందర్భంలో, ఆ ఆధార్ కార్డు మాత్రమే ఆధారంగా ఇచ్చి వారికి ఓటు హక్కు కల్పించాలా? అని సుప్రీంకోర్టు కీలకమైన ప్రశ్న లేవనెత్తింది. ఆధార్ కేవలం సంక్షేమ పథకాల లాభాలను ప్రజలకు అందించడానికి మాత్రమే ఉపయోగపడుతుంది; దీనిని పౌరసత్వం లేదా ఓటు హక్కుకు రుజువుగా పరిగణించలేమని ధర్మాసనం స్పష్టం చేసింది. కొన్ని రాష్ట్రాల్లో ఎన్నికల సంఘం చేపట్టిన ఓటర్ల జాబితా ప్రత్యేక సవరణ (SIR) పై పిటిషన్లు దాఖలు చేయడం వల్ల,ప్రధాన న్యాయమూర్తి జస్టిస్ సూర్యకాంత్, జస్టిస్ జోయ్‌మల్య బాగ్చిలతో కూడిన ధర్మాసనం విచారణ ప్రారంభించింది.
వివరాలు
పౌరసత్వానికి ఆధార్ కార్డు రుజువు కాదని మరోసారి స్పష్టీకరణ
ఈ సందర్భంలో ధర్మాసనం కొన్ని కీలక వ్యాఖ్యలు చేసింది. పొరుగు దేశం నుంచి వచ్చిన ఓ కూలీకి రేషన్ కోసం ఆధార్ కార్డు ఇస్తే, అతడిని ఓటరుగా కూడా నమోదు చేయాలా? అని ప్రధాన న్యాయమూర్తి ప్రశ్నించారు. ఎన్నికల సంఘం కేవలం పోస్టాఫీసు కాదని, ఓటరు దరఖాస్తుతో పాటు సమర్పించిన పత్రాల వాస్తవికతను పరిశీలించే అధికారం దానికి ఉందని స్పష్టం చేసింది. పిటిషనర్ల తరఫున సీనియర్ న్యాయవాది కపిల్ సిబల్ వాదిస్తూ, ఎన్నికల సంఘం చేపట్టిన ప్రక్రియ నిరక్షరాస్యులైన సాధారణ ఓటర్లపై రాజ్యాంగ విరుద్ధమైన భారాన్ని మోపుతోందని తెలిపారు.
వివరాలు
ఓటర్ల జాబితా సవరణపై ఈసీకి డిసెంబర్ 1 వరకు గడువు
ఫారాలు నింపడం తెలియని వారిని జాబితా నుండి తొలగించే అవకాశంపై ఆందోళన వ్యక్తం చేశారు. ఆధార్ పౌరసత్వానికి నిరూపణగా నిలవకపోయినా, నివాసానికి సంబంధించి ప్రాథమిక ఆధారంగా పరిగణించాలి అని వాదించారు. తమిళనాడు,కేరళ,పశ్చిమ బెంగాల్ రాష్ట్రాలకు సంబంధించిన పిటిషన్లపై,డిసెంబర్ 1 వరకు ఎన్నికల సంఘం సమాధానం సమర్పించాలని ధర్మాసనం ఆదేశించింది.