ఏపీలో కబ్జాలపాలైన అటవీభూములను రక్షించాలని కేంద్రానికి చంద్రబాబు లేఖ
ఈ వార్తాకథనం ఏంటి
ఆంధ్రప్రదేశ్ లో అటవీ భూములు అన్యాక్రాంతంపై టీడీపీ అధినేత చంద్రబాబు నాయుడు కేంద్రానికి లేఖ రాశారు. ఈ మేరకు విలువైన భూమిని కాపాడాలని కేంద్రమంత్రి భూపేంద్ర యాదవ్‌ను కోరారు.
ఈ క్రమంలో పశ్చిమ గోదావరి జిల్లా అల్లంచెర్ల రాజుపాలెంలో అటవీ భూములు కబ్జాలకు గురయ్యాయని కేంద్రం దృష్టికి తీసుకెళ్లారు.
1950 నుంచి సుమారు 3 వేల 255 ఎకరాల భూమి అటవీశాఖ పరిధిలోనే ఉందని లేఖలో పేర్కొన్నారు. కానీ ప్రస్తుతం సదరు శాఖకు తెలియకుండా కొంత భూమిని సాగు భూమిగా ప్రకటించారన్నారు.
అప్పట్లో రెవెన్యూ అధికారులు తీసుకున్న నిర్ణయంపై పలు కోర్టుల్లో ఇప్పటికీ వాదనలు కొనసాగుతున్నాయని, సదరు భూమి తమ అధీనంలోనే ఉందని ఆక్రమణదారులు కోర్టుమెట్లెక్కిన విషయాన్ని తన లేఖలో చంద్రబాబు ప్రస్తావించారు.
DETAILS
అవినీతి అధికారులపై కొరడా ఝులిపించాలి : చంద్రబాబు
అటవీశాఖకు చెందిన భూముల్లో కబ్జాను నియంత్రించి, పూర్వస్థితిని కొనసాగించేందుకు ఉత్తర్వులున్నాయని చంద్రబాబు గుర్తుచేశారు.
ఎక్కడికక్కడ విద్యుత్‌ స్తంభాలు ఏర్పాటు చేస్తూ, బోరు బావులు తవ్వుతున్నారని లేఖలో పేర్కొన్నారు. అక్రమ రెవెన్యూ రికార్డులు సృష్టించి ప్రభుత్వ భూములు అన్యక్రాంతం చేసేవారికి ఏపీ సర్కార్ మద్దతిస్తోందన్నారు.
ఈ విషయంలో కేంద్ర సర్కార్ తక్షణమే జోక్యం చేసుకుని, విలువైన అటవీ సంపదను కాపాడాలని విజ్ఞప్తి చేశారు. ఈ మేరకు తక్షణమే సర్వే చేసి స్పష్టమైన సరిహద్దులు ఏర్పరచాలని సూచించారు.
ఈ నేపథ్యంలో పలు కోర్టుల్లో పెండింగ్‌లో ఉన్న కేసులపై రాష్ట్ర ప్రభుత్వం సైతం పోరాడాలన్నారు. కబ్జాదారులతో చేతులు కలిపిన అధికారులపై కొరడా ఝులిపించాలని లేఖ ద్వారా కోరారు.