తెలంగాణ అసెంబ్లీ: ప్రభుత్వంపై అక్బరుద్దీన్ విమర్శలు, మంత్రి కేటీఆర్ కౌంటర్
ఈ వార్తాకథనం ఏంటి
తెలంగాణ అసెంబ్లీలో ఏఎంఐఎం ఎమ్మెల్యే అక్బరుద్దీన్ ఒవైసీ, మంత్రి కేటీఆర్ మధ్య డైలాగ్ వార్ నడిచింది. హైదరాబద్ అభివృద్ధి, ప్రభుత్వం పనితీరుపై అక్బరుద్దీన్ ఘాటుగా విమర్శలు గుప్పించారు. మంత్రి కేటీఆర్ సైతం అదే స్థాయిలో కౌంటర్ ఇచ్చారు.
ఉర్దూను రెండో అధికార భాషగా ప్రకటించినప్పటికీ రాష్ట్ర ప్రభుత్వం దానికి తగిన న్యాయం చేయడం లేదని అక్బరుద్దీన్ విమర్శించారు. సచివాలయంలో మసీదు నిర్మాణం పరిస్థితి, ఉస్మానియా ఆసుపత్రి నిర్మాణంపై ప్రభుత్వాన్ని నిలదీశారు.
హైటెక్ సిటీలో శరవేగంగా అభివృద్ధి జరుగుతున్నా పాతబస్తీలో మాత్రం అభివృద్ధి జరగకపోవడంపై ఎమ్మెల్యే అక్బరుద్దీన్ ప్రశ్నించారు. హైదరాబాద్‌ మెట్రో ప్రాజెక్టులు ఎప్పుడు పూర్తి చేస్తారో చెప్పాలని డిమాండ్ చేశారు.
కేటీఆర్
బీఏసీ సమావేశానికి హాజరుకాకుండా మాట్లాడడం సరికాదు: మంత్రి కేటీఆర్
తాము కలవడానికి సీఎం కేసీఆర్, మంత్రులు అనుమతివ్వడం లేదని అక్బరుద్దీన్ ఆరోపించారు. తెలంగాణ ప్రజల ప్రయోజనాల కోసం చెప్పరాశిని కూడా కలవడానికి సిద్ధంగా ఉన్నామని పేర్కొన్నారు.
ఏఎంఐఎం ఎమ్మెల్యే అక్బరుద్దీన్ ఒవైసీ ఆరోపణలకు మంత్రి కేటీఆర్ అదే స్థాయిలో కౌంటర్ ఇచ్చారు. బీఏసీ సమావేశానికి హాజరుకాకుండా మాట్లాడడం సరికాదని మంత్రి కేటీఆర్ సమాధానం చెప్పారు.
కేవలం ఏడుగురు సభ్యులతో కూడిన ఎంఐఎం సెషన్‌లో మాట్లాడేందుకు ఎక్కువ సమయం తీసుకుంటోందని అభ్యంతరం తెలిపారు. సభలో నిబంధనలను పాటించాలని సూచించారు.
అనంతరం స్పందించిన ఓవైసీ, వచ్చే ఎన్నికల్లో 50స్థానాల్లో పోట చేస్తామని ప్రకటించారు. తాను చాలా సార్లు ఎమ్మెల్యేగా గెలుపొందానని, సభలోని నిబంధనల గురించి తనకు తెలుసునన్నారు.