Telangana: బాయిలర్ల సర్టిఫికెట్ల గడువు మరో మూడు నెలలు పొడిగింపు
ఈ వార్తాకథనం ఏంటి
తెలంగాణలో బాయిలర్ల సర్టిఫికెట్ల గడువు మరో మూడు నెలలు పొడిగిస్తూ రాష్ట్ర ప్రభుత్వం కీలక నిర్ణయం తీసుకుంది. ఈ మేరకు మంగళవారం జీవో నంబర్ 465 జారీ చేసింది. కేంద్ర ప్రభుత్వం ఇచ్చిన సూచనల మేరకు ఈ నిర్ణయం తీసుకున్నట్లు ఉత్తర్వుల్లో వెల్లడించింది. పశ్చిమాసియాలో నెలకొన్న ఉద్రిక్తతల కారణంగా ఇంధన సరఫరాపై తీవ్ర ప్రభావం పడిందని ప్రభుత్వం పేర్కొంది. ఈ నేపథ్యంలో ఇంధన వినియోగాన్ని సమర్థంగా నిర్వహించడంతోపాటు పరిశ్రమలకు ఇబ్బందులు కలగకుండా ప్రత్యేక వెసులుబాటు కల్పించినట్లు వివరించింది. 100 టన్నులు లేదా అంతకంటే ఎక్కువ సామర్థ్యం కలిగిన బాయిలర్లకు మాత్రమే ఈ గడువు పొడిగింపు వర్తించనుంది.
వివరాలు
గడువు ముగియనున్న యూనిట్లకు అదనంగా మూడు నెలల సమయం
ప్రభుత్వం తీసుకున్న తాజా నిర్ణయంతో విద్యుత్ కేంద్రాలు, చమురు, గ్యాస్ పరిశ్రమలకు ఊరట లభించనుంది.
పెట్రోలియం రిఫైనరీలు, పెట్రోకెమికల్, ఎరువుల తయారీ పరిశ్రమలకు కూడా ప్రయోజనం చేకూరనుంది.
గతంలో జారీ చేసిన నోటిఫికేషన్ ప్రకారం 2026 నవంబర్ 30వ తేదీ వరకు మాత్రమే అమలు గడువు ఉంది.
అయితే ఆరు నెలల్లో బాయిలర్ సర్టిఫికెట్ గడువు ముగియనున్న యూనిట్లకు అదనంగా మూడు నెలల సమయం కల్పిస్తూ ప్రభుత్వం నిర్ణయం తీసుకుంది.
అయితే ఈ వెసులుబాటు ఇచ్చినప్పటికీ భద్రతా ప్రమాణాలు, సాంకేతిక తనిఖీల విషయంలో ఎలాంటి మినహాయింపులు ఉండవని స్పష్టం చేసింది.
బాయిలర్ల భద్రతకు సంబంధించిన నిబంధనలు తప్పనిసరిగా పాటించాలని జీవోలో పేర్కొంది.