Telangana: మరో రూ.2 వేల కోట్ల రుణాల సేకరణకు బాండ్లను విక్రయించనున్న తెలంగాణ ప్రభుత్వం
ఈ వార్తాకథనం ఏంటి
తెలంగాణ రాష్ట్ర ప్రభుత్వం మరో రూ.2 వేల కోట్ల రుణాల సేకరణకు బాండ్లను విక్రయానికి పెట్టింది.
వీటిని మంగళవారం వేలం వేయనున్నట్లు రిజర్వ్ బ్యాంక్ వెల్లడించింది.ఈ మొత్తంతో కలిపి ప్రస్తుత ఆర్థిక సంవత్సరం (2024-25)లో ప్రభుత్వం తీసుకున్న రుణాలు రూ.67,672 కోట్లకు చేరుకున్నాయి.
ఈ ఏడాదికి రూ.49,255 కోట్ల రుణాలు సరిపోతాయని బడ్జెట్‌లో అంచనా వేశారు.పాత బాకీలపై వడ్డీ కిస్తీల కింద రూ.17,729.77 కోట్లు సరిపోతాయని ప్రభుత్వం భావించింది.
అయితే, ఆర్థిక సంవత్సరం తొలి 10 నెలల్లో (గత ఏప్రిల్ నుంచి జనవరి వరకు)రూ.22,056 కోట్లు చెల్లించాల్సి వచ్చింది.
వివరాలు
వచ్చే ఏడాదికి రూ.60 వేల కోట్లకు పైగా రుణ లక్ష్యం!
ఫిబ్రవరి,మార్చి నెలల్లో వడ్డీ కిస్తీల చెల్లింపులతో ఈ మొత్తం రూ.27 వేల కోట్లకు చేరే అవకాశం ఉంది.
ఇక పాత బాకీల అసలు మొత్తం కింద మరో రూ.50 వేల కోట్లకు పైగా చెల్లింపులు జరిగాయి.
పాత బాకీలపై వడ్డీ భారం పెరుగుతుండటంతో ప్రభుత్వం ఎక్కువ రుణాలు సేకరించాల్సి వస్తోందని ఆర్థిక శాఖ వర్గాలు పేర్కొంటున్నాయి.
ఈ నెలలో ప్రభుత్వం శాసనసభలో బడ్జెట్‌ను ప్రవేశపెట్టనుంది.వచ్చే ఆర్థిక సంవత్సరం (2025-26)లో ప్రభుత్వం కొత్తగా తీసుకునే రుణాల లక్ష్యం రూ.60 వేల కోట్లకు పైగానే ఉండే అవకాశం ఉంది.
అభివృద్ధి పనులు,సంక్షేమ పథకాల కోసం భారీగా నిధులు అవసరమవ్వడం,పాత బాకీల కిస్తీలకు చెల్లింపులు పెరగడం వల్ల రుణాల సేకరణ మరింత పెరిగే సూచనలు కనిపిస్తున్నాయి.
వివరాలు
అభివృద్ధి పనుల కోసం నిధుల కేటాయింపులో సవాళ్లు
పన్నుల ద్వారా ఆదాయం తగినంతగా లభించకపోతే రుణసేకరణ తప్పనిసరిగా పెరగాల్సి వస్తుందని అధికారులు చెబుతున్నారు.
ప్రస్తుత ఆర్థిక సంవత్సరం చివరి నెల (మార్చి)లో కనీసం రూ.18 వేల కోట్ల ఆదాయం లభించవచ్చని అంచనా వేస్తున్నారు.
జీతాలు, పింఛన్లకు రూ.6 వేల కోట్లు, పాత బాకీల కిస్తీలకు మరో రూ.6 వేల కోట్లు కేటాయించాల్సిన అవసరం ఉందని ఆర్థిక శాఖ లెక్కలు చెబుతున్నాయి.
ఈ నేపథ్యంలో అభివృద్ధి పనుల కోసం నిధుల కేటాయింపులో సవాళ్లు ఎదురయ్యే అవకాశం ఉందని అధికార వర్గాలు వెల్లడించాయి.