Telangana: తెలంగాణలో మరో కొత్త జిల్లా? జైపాల్ రెడ్డి పేరు పెడతారని ప్రచారం..!
ఈ వార్తాకథనం ఏంటి
తెలంగాణలో మరో కొత్త జిల్లా ఏర్పాటు కానుందనే ప్రచారం మొదలైంది. హైదరాబాద్ శివార్లలో రేవంత్ రెడ్డి ప్రభుత్వం ప్రతిష్ఠాత్మకంగా నిర్మిస్తున్న ఫ్యూచర్ సిటీ ప్రాంతాన్ని ప్రత్యేక జిల్లాగా ఏర్పాటు చేసే అవకాశం ఉందని వార్తలు వస్తున్నాయి. ఈ మేరకు ప్రభుత్వానికి ప్రతిపాదనలు అందినట్లు మీడియాలో కథనాలు వెలువడుతున్నాయి. ఈ కొత్త జిల్లాకు దివంగత కాంగ్రెస్ సీనియర్ నేత, మాజీ కేంద్ర మంత్రి జైపాల్ రెడ్డి పేరు పెట్టే అవకాశం ఉందని కూడా చర్చ జరుగుతోంది. ముఖ్యమంత్రి రేవంత్ రెడ్డి భార్యకు జైపాల్ రెడ్డి పెదనాన్న కావడం ఈ ప్రచారానికి మరో కారణంగా కనిపిస్తోంది.
వివరాలు
ఫ్యూచర్ సిటీ అభివృద్ధి నేపథ్యంలో మరో జిల్లా ఏర్పాటు అంశం
తెలంగాణ రాష్ట్రం ఏర్పడిన సమయంలో పది జిల్లాలు ఉండేవి. ఆ తర్వాత కేసీఆర్ ప్రభుత్వం జిల్లాల పునర్విభజన చేపట్టి వాటి సంఖ్యను 33కు పెంచింది.
ఇప్పుడు ఫ్యూచర్ సిటీ అభివృద్ధి నేపథ్యంలో మరో జిల్లా ఏర్పాటు అంశం తెరపైకి వచ్చింది.
హైదరాబాద్ శివార్లలోని హయత్‌నగర్‌తోపాటు ఇబ్రహీంపట్నం,షాద్‌నగర్,మహేశ్వరం,కల్వకుర్తి, దేవరకొండ నియోజకవర్గాలను కొత్త జిల్లాలో చేర్చే అవకాశం ఉందని రెవెన్యూ వర్గాల్లో చర్చ జరుగుతోంది.
దివంగత నేత జైపాల్ రెడ్డి స్వగ్రామం మాడ్గుల.ఇది కల్వకుర్తి నియోజకవర్గ పరిధిలో ఉంది.
దీంతో ప్రతిపాదిత జిల్లాకు ఆయన పేరు పెడితే సముచితంగా ఉంటుందని కొందరు భావిస్తున్నట్లు సమాచారం.
అయితే కొత్త జిల్లా ఏర్పాటు,దానికి జైపాల్ రెడ్డి పేరు పెట్టే అంశాలపై ప్రభుత్వం ఇప్పటివరకు ఎలాంటి అధికారిక ప్రకటన చేయలేదు.
వివరాలు
ఫ్యూచర్ సిటీ డెవలప్‌మెంట్ అథారిటీ పరిధిలో 56 రెవెన్యూ గ్రామాలు
మరోవైపు ఫ్యూచర్ సిటీ డెవలప్‌మెంట్ అథారిటీ పరిధిలో ప్రస్తుతం 56 రెవెన్యూ గ్రామాలు ఉన్నాయి.
మహేశ్వరం మండలంలోని 28 గ్రామాలతోపాటు కందుకూరు మండలంలోని తొమ్మిది గ్రామాలను కూడా ఈ అథారిటీ పరిధిలోకి తీసుకురావాలని రేవంత్ ప్రభుత్వం నిర్ణయించింది.
ఫ్యూచర్ సిటీ అభివృద్ధి ప్రణాళికల్లో భాగంగా ఈ ప్రాంతంలో పరిపాలనాపరమైన మార్పులు చోటుచేసుకునే అవకాశం ఉందని తెలుస్తోంది.
అయితే ప్రస్తుతం జనాభా లెక్కల సేకరణ ప్రక్రియ కొనసాగుతున్న నేపథ్యంలో పరిపాలనా సరిహద్దుల్లో మార్పులు చేయడానికి అవకాశం లేదు.
2027 మార్చి వరకు జిల్లాలు, మండలాలు, రెవెన్యూ డివిజన్ల సరిహద్దులను మార్చడం సాధ్యం కాదని గతంలో ముఖ్యమంత్రి రేవంత్ రెడ్డి వెల్లడించారు.
వివరాలు
రాష్ట్రంలోని జిల్లాల సంఖ్య పెరిగే అవకాశం లేదనే ప్రచారం
ఈ అంశంపై ఇప్పటికే ప్రభుత్వానికి వచ్చిన వినతులను కూడా 2027 మార్చి తర్వాతే జ్యుడీషియల్ కమిషన్‌కు పంపిస్తామని స్పష్టం చేశారు. దీంతో కొత్త జిల్లా ఏర్పాటు విషయంలో 2027 మార్చి తర్వాతే స్పష్టత వచ్చే అవకాశం ఉంది.
అయితే కొత్త జిల్లా ఏర్పాటు చేసినప్పటికీ రాష్ట్రంలోని జిల్లాల సంఖ్య పెరిగే అవకాశం లేదనే ప్రచారం జరుగుతోంది.
గతంలో కేసీఆర్ ప్రభుత్వం జిల్లాల ఏర్పాటు విషయంలో శాస్త్రీయ విధానాన్ని అనుసరించకుండా స్థానిక డిమాండ్ల ఆధారంగా నిర్ణయాలు తీసుకుందని విమర్శలు ఉన్నాయి.
ఈ నేపథ్యంలో రేవంత్ ప్రభుత్వం జిల్లాల పునర్వ్యవస్థీకరణ చేపట్టే అవకాశం ఉందని తెలుస్తోంది.
వివరాలు
నాలుగు పోలీస్ కమిషనరేట్లు
ఇందులో భాగంగా సిరిసిల్ల, జనగామ, భూపాలపల్లి, ములుగు వంటి చిన్న జిల్లాల్లో కొన్నింటిని సమీప జిల్లాల్లో విలీనం చేసే ఆలోచనలో ఉన్నట్లు ప్రచారం జరుగుతోంది.
ఇదిలా ఉండగా, హైదరాబాద్ నగరంలో గతంలో మూడు పోలీస్ కమిషనరేట్లు ఉండేవి.
రేవంత్ ప్రభుత్వం వాటి సంఖ్యను నాలుగుకు పెంచింది.
ఈ నాలుగు పోలీస్ కమిషనరేట్ల పరిధులను నాలుగు జిల్లాలుగా గుర్తించే ఆలోచన కూడా ప్రభుత్వ పరిశీలనలో ఉందని ప్రచారం సాగుతోంది.
అయితే ఈ ప్రతిపాదనలపై ప్రభుత్వం నుంచి అధికారిక ప్రకటన రావాల్సి ఉంది.