Amaravati: రాజధానిలో ప్రపంచ బ్యాంకు, ఏడీబీ రుణంతో చేపట్టబోయే పలు అభివృద్ధి పనులకు టెండర్లు
ఈ వార్తాకథనం ఏంటి
ఆంధ్రప్రదేశ్ రాజధానిలో ప్రపంచ బ్యాంకు, ఏషియన్ డెవలప్‌మెంట్ బ్యాంకు (ఏడీబీ) రుణ సహాయంతో చేపట్టబోయే పలు అభివృద్ధి పనులకు అమరావతి డెవలప్‌మెంట్ కార్పొరేషన్ (ఏడీసీ) టెండర్లు పిలిచింది. గతంలో టీడీపీ ప్రభుత్వ హయాంలో ప్రారంభమైన, కానీ వైసీపీ ప్రభుత్వ నిర్లక్ష్యంతో నిలిచిపోయిన పనులను పూర్తి చేయడానికి బిడ్లు ఆహ్వానించారు. ఈ ప్రాజెక్టులలో మొత్తం రూ.2,791.31 కోట్ల విలువైన ఎనిమిది పనులు ఉన్నాయి. బిడ్ల దాఖలుకు ఈ నెల 31న సాయంత్రం 4 గంటల వరకు గడువును నిర్ణయించారు. అదే రోజు సాయంత్రం 5 గంటలకు సాంకేతిక బిడ్లను తెరవనున్నారు.
వివరాలు
ఆరు రాజధాని ప్రాంతంలో రోడ్ల అభివృద్ధి పనులు
ఈ పనుల్లో రెండు పాలవాగు, గ్రావిటీ కాలువల పనులు ఉండగా, మిగిలిన ఆరు రాజధాని ప్రాంతంలో రోడ్ల అభివృద్ధి పనులకు సంబంధించినవిగా ఉన్నాయి. శ్రీ అనంతవరం నుంచి ఉండవల్లి వరకు కొండవీటి వాగు, అలాగే దొండపాడు నుంచి కృష్ణాయపాలెం వరకు పాలవాగును వెడల్పు, లోతు చేయనున్నారు. శాఖమూరులో రూ.462.26 కోట్ల వ్యయంతో 0.03 టీఎంసీ సామర్థ్యంతో రిజర్వాయర్ నిర్మాణం చేయనున్నారు. రూ.303.73 కోట్ల వ్యయంతో 7.83 కి.మీ. నిడివిగల కాలువ నిర్మాణం మరియు 0.1 టీఎంసీ సామర్థ్యంతో కృష్ణాయపాలెం రిజర్వాయర్ పనులు చేయబోతున్నారు.
వివరాలు
సైకిల్ ట్రాక్‌లు, విద్యుత్, కమ్యూనికేషన్ తీగల కోసం డక్ట్‌ల ఏర్పాటు
అదనంగా, రూ.372.23 కోట్లతో ఈ8 రోడ్డు, రూ.419.96 కోట్లతో ఈ9 రోడ్డు, రూ.241.67 కోట్లతో ఈ14 రోడ్డు, రూ.443.84 కోట్లతో ఎన్‌12 రోడ్డు, రూ.183.21 కోట్లతో ఎన్‌6 రోడ్డు, రూ.364.41 కోట్లతో ఈ3 రోడ్లను నిర్మించనున్నారు. రోడ్ల వెంట వాననీటి మళ్లింపు కాలువలు, తాగునీటి సరఫరా పైపులైన్లు, డ్రెయినేజీ వ్యవస్థలు, పచ్చదనం అభివృద్ధి, పాదచారులు, సైకిల్ ట్రాక్‌లు, విద్యుత్, కమ్యూనికేషన్ తీగల కోసం డక్ట్‌లు ఏర్పాటు చేయనున్నారు.