Narendra Modi: ప్రధాని మోదీకి 'ది ఆర్డర్ ఆఫ్ ది నైజర్' అవార్డు.. ప్రకటించిన నైజీరియా ప్రభుత్వం
ప్రధానమంత్రి నరేంద్ర మోదీకి నైజీరియా ప్రభుత్వం అత్యున్నత గౌరవాన్ని ప్రకటించింది. మోదీకి 'ది ఆర్డర్ ఆఫ్ ది నైజర్ - గ్రాండ్ కమాండర్' పురస్కారం ప్రదానం చేయనున్నట్లు పేర్కొంది. 1969లో క్వీన్ ఎలిజబెత్‌ IIకి ఈ పురస్కారం అందించిన తర్వాత, మోదీ దీనిని అందుకోనున్న మరో ప్రముఖ విదేశీయునిగా రికార్డుకెక్కాడు. మోదీకి ఇది 17వ అంతర్జాతీయ గౌరవం కావడం విశేషం. నైజీరియాలోని అబుజా చేరుకున్న మోదీకి ఫెడరల్ క్యాపిటల్ టెరిటరీ మంత్రి నైసోమ్ ఎజెన్‌వో స్వాగతం పలికారు. జ్ఞాపికను అందజేస్తూ, భారత ప్రధానిపై ఉన్న విశ్వాసం, గౌరవానికి ఇది ప్రతీక అని విదేశీ వ్యవహారాల మంత్రిత్వ శాఖ స్పష్టం చేసింది. మోదీ మూడు దేశాల పర్యటనలో భాగంగా నైజీరియాకు చేరుకున్నారు.
బ్రెజిల్ వెళ్లనున్న మోదీ
నైజీరియా అధ్యక్షుడు బొలా అహ్మద్‌ టినుబు ఆహ్వానం మేరకు ఆయన ఈ పర్యటన చేపట్టారు. ఇరుదేశాల మధ్య ద్వైపాక్షిక సంబంధాలపై చర్చించేందుకు సమావేశమయ్యారు. ఇక్కడి కార్యక్రమాల అనంతరం మోదీ జీ-20 శిఖరాగ్ర సదస్సులో పాల్గొనడానికి బ్రెజిల్ వెళ్లనున్నారు. 18, 19 తేదీల్లో రియో డీ జనీరోలో జరిగే ఈ సదస్సుకు చైనా అధ్యక్షుడు జిన్‌పింగ్, అమెరికా అధ్యక్షుడు జో బైడెన్‌ సహా వివిధ దేశాధినేతలు హాజరవుతారు. నవంబర్‌ 19న మోదీ గయానాకు వెళ్లి ఆ దేశాధ్యక్షుడి ఆహ్వానం మేరకు 21వ తేదీ వరకు అక్కడ కార్యక్రమాల్లో పాల్గొంటారు.
