హైదరాబాద్ మెట్రోను పరిశీలించిన పార్లమెంట్ స్టాండింగ్ కమిటీ
ఎంపీ రాజీవ్ రంజన్ సింగ్ నేతృత్వంలోని 14 మంది సభ్యులతో కూడిన హౌసింగ్, అర్బన్ వ్యవహారాల పార్లమెంటరీ స్టాండింగ్ కమిటీ హైదరాబాద్ మెట్రో రైలు సందర్శించింది. రాయదుర్గ్ నుంచి అమీర్‌పేట్ స్టేషన్ వరకు ప్రయాణించారు. రాజ్యసభ, లోక్‌సభ సభ్యులతో కూడిన కమిటీకి హైదరాబాద్ మెట్రో ఎండీ ఎన్వీఎస్ రెడ్డితో పాటు ఎల్అండ్‌టీ ఎంహెచ్ఆర్ఎల్ ఎండీ కేవీబీ రెడ్డి మెట్రో రైలు గురించి వివరించారు. గత ఐదేళ్లలో హైదరాబాద్ మెట్రో సాధించిన మైలురాళ్ల గురించి ఎంపీలకు వారు చెప్పారు. హైదరాబాద్ మెట్రో రైలు ప్రపంచంలోనే అతిపెద్ద మెట్రోరైలు ప్రాజెక్టుగా పీపీపీ విధానంలో నిలిచిందని, ప్రయాణికులకు అనేక సౌకర్యాలు కల్పిస్తున్నామని ఎన్వీఎస్ రెడ్డి కమిటీ సభ్యులకు తెలియజేశారు.
ఎయిర్‌పోర్ట్ మెట్రో ఎక్స్‌ప్రెస్ ప్రాజెక్ట్ విశేషాలను వివరించిన ఎన్వీఎస్ రెడ్డి
అమీర్‌పేట్ స్టేషన్‌లోని షాపింగ్ మాల్, ఇతర సౌకర్యవంతమైన దుకాణాలను హౌసింగ్, పట్టణ వ్యవహారాల స్టాండింగ్ కమిటీ సభ్యులకు దగ్గరుండి చూపించారు. ఇవి ప్రయాణికులకు ఉపయోగకరంగా ఉండటంతోపాటు మెట్రో యాజమాన్యానికి ఆదాయాన్నికూడా సమకూరుస్తుడటంపై సభ్యులు ప్రశంసించారు. 100శాతం రాష్ట్ర ప్రభుత్వ నిధులతో నిర్మిస్తున్న కొత్త ఎయిర్‌పోర్ట్ మెట్రో ఎక్స్‌ప్రెస్ ప్రాజెక్ట్ విశేషాలను కూడా ఎన్వీఎస్ రెడ్డి వివరించారు. సర్వే, ఇతర ముందస్తు నిర్మాణ పనులు శరవేగంగా జరుగుతున్నాయని, త్వరలోనే ప్రాజెక్టును గ్రౌండింగ్ చేస్తామని ఆయన సభ్యులకు ఎన్వీఎస్ రెడ్డి తెలియజేశారు. హైదరాబాద్ మెట్రోను సందర్శించిన వారిలో ఆర్ గిరిరాజన్, రామ్ చందర్ జాంగ్రా, కవితా పటీదార్, బెన్నీ బెహనన్, శంకర్ లాల్వానీ, మసూది తదితరులు ఉన్నారు.
