Bus Accident: కర్నూలు, నిర్మల్లో జరిగిన రోడ్డు ప్రమాదాల్లో ముగ్గురు మృతి, పలువురికి గాయలు
ఆంధ్రప్రదేశ్‌లోని కర్నూలు, తెలంగాణలోని నిర్మల్లో గురువారం ఉదయం రెండు వేర్వేరు రోడ్డు ప్రమాదాలు జరగడంతో తెలుగు రాష్ట్రాల్లో విషాదఛాయలు అలుముకున్నాయి. కర్నూలు జిల్లా కోడుమూరు సమీపంలో ప్రైవేట్ ట్రావెల్స్ బస్సు బోల్తా పడి ఇద్దరు చిన్నారులు మృతి చెందారు. ప్రమాదం జరిగిన సమయంలో బస్సులో 30 మంది ప్రయాణికులు ఉండగా, పలువురికి గాయాలయ్యాయి. గాయపడిన ప్రయాణికులను స్థానిక పోలీసులు రక్షించి చికిత్స నిమిత్తం కర్నూలు ప్రభుత్వాసుపత్రికి తరలించారు. బస్సు హైదరాబాద్ నుండి ఆదోని వెళ్తుండగా ఈ ప్రమాదం చోటుచేసుకుంది.
నిర్మల్లో ప్రైవేట్ ట్రావెల్స్ బస్సు బోల్తా
నిర్మల్ జిల్లాలో మరో ఘటనలో సారంగాపూర్ మండలం మహబూబ్ ఘాట్‌పై ప్రైవేట్ బస్సు బోల్తా పడి 25 మంది ప్రయాణికులకు గాయాలు కాగా, ఒకరు మృతి చెందారు. గాయపడిన వారిలో పది మందిని చికిత్స నిమిత్తం నిర్మల్ ప్రభుత్వాసుపత్రికి తరలించగా, తీవ్రగాయాలతో ఉన్న ఇద్దరిని తదుపరి వైద్యసేవల నిమిత్తం హైదరాబాద్‌కు తరలించారు. పోలీసుల కథనం ప్రకారం.. బస్సు ఆదిలాబాద్‌ నుంచి హైదరాబాద్‌కు వెళ్తుండగా కారును ఓవర్‌టేక్‌ చేసేందుకు ప్రయత్నిస్తుండగా ఈ ప్రమాదం జరిగింది.
