Army Officers: ఇద్దరు ఆర్మీ అధికారులపై దాడి.. స్నేహితురాలిపై సామూహిక అఘాయిత్యం
మధ్యప్రదేశ్‌ ఇండోర్‌లో ఓ దారుణ ఘటన చోటుచేసుకుంది. స్నేహితులతో కలిసి బయటకు వెళ్లిన ట్రైనీ ఆర్మీ అధికారులపై దుండగులు దాడి చేశారు. దాడిలో డబ్బులు దోచుకోవడమే కాకుండా, వారి స్నేహితురాలిపై సామూహిక అత్యాచారం చేశారు. ఇండోర్‌లోని మోవ్‌ ఆర్మీ కాలేజీలో శిక్షణలో ఉన్న ఇద్దరు యువ ఆర్మీ అధికారులు తమ స్నేహితురాళ్లతో కలిసి సమీపంలోని పిక్నిక్‌ స్పాట్‌కు వెళ్లారు. అక్కడ కొంతమంది గుర్తు తెలియని వ్యక్తులు వారిపై ఆకస్మికంగా దాడి చేసి, వారి వద్ద ఉన్న డబ్బు, నగలను లాక్కున్నారు. ఆపై, స్నేహితురాళ్లలో ఒకరిపై అత్యాచారం జరిపారు.
ఇద్దరు నిందితులు అరెస్ట్‌
ఘటనలో ఓ ట్రైనీ ఆఫీసర్‌ దుండగుల నుంచి తప్పించుకుని, పోలీసులకు, ఆర్మీ ఉన్నతాధికారులకు సమాచారం ఇచ్చాడు. పోలీసులు సంఘటనా ప్రదేశానికి చేరుకునేసరికి దుండగులు అక్కడి నుంచి పరారయ్యారు. బాధిత మహిళకు వైద్య పరీక్షలు నిర్వహించగా, అత్యాచారం జరిగినట్లు నిర్ధారించారు. కేసు నమోదు చేసిన పోలీసులు, ఇద్దరు నిందితులను అరెస్ట్‌ చేశారు. వీరికి గతంలో క్రిమినల్‌ రికార్డు ఉన్నట్లు గుర్తించారు. దర్యాప్తు కొనసాగుతోంది.
