TSRTC: ప్రయాణికుల కోసం రెండు స్పెషల్ ఆఫర్స్‌ ప్రకటించిన తెలంగాణ ఆర్టీసీ
హైదరాబాద్‌లో ప్రయాణికుల కోసం తెలంగాణ రాష్ట్ర రోడ్డు రవాణా సంస్థ (టీఎస్ఆర్‌టీసీ) రెండు ప్రత్యేకమైన ఆఫర్లను గురువారం లాంఛ్ చేసింది. గ్రేటర్ హైదరాబాద్‌లోని ప్రయాణికులకు సరసమైన ధరలో, సౌకర్యవంతమైన ప్రయాణాన్ని అందించాలనే లక్ష్యంతో ఈ ప్రత్యేక ఆఫర్లను తీసుకొచ్చింది. మొదటి ఆఫర్ టీ-6 టికెట్.. ఇది మహిళలు, సీనియర్ సిటిజన్లకు అందుబాటులో ఉంది. ఈ టికెట్ హైదరాబాద్ సబర్బన్ పరిమితుల్లో సిటీ ఆర్డినరీ,మెట్రో ఎక్స్‌ప్రెస్ బస్సులలో ఉదయం 10 నుంచి సాయంత్రం 4 గంటల మధ్య ప్రయాణించే తక్కువ ధరకే ప్రయాణించొచ్చు. వీరికి టికెట్ ధరలో రాయితీ లభిస్తుంది. టీ-6 టికెట్ ధర సాధారణ ఛార్జీల కంటే చాలా తక్కువ. కేవలం రూ.50 మాత్రమే.
గతంలో ప్రవేశపెట్టిన టి-24 టికెట్ విశేష స్పందన
రెండో ఆఫర్ ఎఫ్-24 టికెట్.. ఇది కలిసి ప్రయాణించాలనుకునే వారికి బాగా ఉపయోగపడుతుంది. కుటుంబం, స్నేహితుల సమూహాల కోసం దీన్ని తీసుకొస్తున్నట్లు టీఎస్ఆర్‌టీసీ మేనేజింగ్ డైరెక్టర్ సజ్జనార్ పేర్కొన్నారు. ఈ టిక్కెట్ ధర రూ.300 ఉంటుంది. హైదరాబాద్ సబర్బన్ పరిమితుల్లో వారాంతాల్లో, ప్రభుత్వ సెలవు దినాల్లో నాలుగు బృందాలుగా ప్రయాణించాలనుకునే వారికి ఇది సరైనది. ఎఫ్-24 టిక్కెట్‌ను కొనుగోలు చేసినప్పటి నుంచి 24 గంటల పాటు సిటీ ఆర్డినరీ, మెట్రో ఎక్స్‌ప్రెస్ బస్సుల్లో ప్రయాణించవచ్చు. గతంలో ప్రవేశపెట్టిన టి-24 టికెట్‌కు ప్రయాణికుల నుంచి అనూహ్య స్పందన లభించిందని, దాని స్ఫూర్తితోనే ఈ రెండు కొత్త ఆఫర్లను తీసుకొచ్చినట్లు సజ్జనార్ వెల్లడించారు.
ఈ టైమ్ లైన్ ని షేర్ చేయండి