'జాతీయ సివిల్ సర్వీసెస్ డే 2023'ను ఎందుకు జరుపుకుంటారు? ప్రాముఖ్యతను తెలుసుకోండి
ఇండియన్ అడ్మినిస్ట్రేటివ్ సర్వీస్(IAS), ఇండియన్ పోలీస్ సర్వీస్(IPS), ఇండియన్ ఫారిన్ సర్వీస్(IFS) భారతదేశంలోని సివిల్ సర్వీసెస్‌లో భాగం. ఈ మూడు విభాగాల అధికారులను సివిల్ సర్వెంట్లు అంటారు. సివిల్ సర్వెంట్స్ పౌరులకు సేవలను అందించేందుకు తమను తాము అంకితం చేసుకుంటారు. ప్రతి ఏటా ఏప్రిల్ 21న 'జాతీయ సివిల్ సర్వీసెస్ డే'ను ఎందుకు జరుపుకుంటారు? దాని ప్రాముఖ్య ఎంటో ఇప్పుడు తెలుసుకుందాం. సివిల్ సర్వెంట్లు ఏ రాజకీయ పార్టీకి బాధ్యులుగా ఉండరు. కానీ అధికారంలో ఉన్న రాజకీయ పార్టీ విధానాలను అమలు చేసేందుకు అహర్నిశలు కృషి చేస్తారు. సివిల్ సర్వెంట్లు వారి ఆదర్శప్రాయమైన సేవలను స్మరించుకోవడానికి, రాబోయే సంవత్సరానికి సంబంధించిన ప్రణాళికలను రూపొందించుకోవడానికి ఏప్రిల్ 21ని ఒక వేదికగా చేసుకుంటారు.
జాతీయ పౌర సేవల దినోత్సవం చరిత్ర ఇదే
సివిల్ సర్వీస్ పదం బ్రిటిష్ కాలం నాటిది. ఈస్ట్ ఇండియా కంపెనీ పౌర సిబ్బంది, పరిపాలనా ఉద్యోగులను నియమించుకునేవారు. వారిని 'పబ్లిక్ సర్వెంట్స్' అని పిలిచేవారు. 'పబ్లిక్ సర్వెంట్స్' వ్యవస్థను బ్రిటన్ పాలనలో వారెన్ హేస్టింగ్స్ తీసుకొచ్చారు. ఆ తర్వాత ఈ వ్యవస్థలో 'చార్లెస్ కార్న్వాలిస్' అనేక సంస్కరణలు తీసుకొచ్చారు. అందుకే కార్న్వాలిస్‌ను 'భారత సివిల్ సర్వీసెస్ పితామహుడు' అని పిలుస్తారు. 1947లో దిల్లీలో అడ్మినిస్ట్రేటివ్ సర్వీసెస్ ప్రబేషనరీ అధికారులను ఉద్దేశించి భారత తొలి హోంమంత్రి సర్దార్ వల్లభాయ్ పటేల్ ఏప్రిల్ 21న ప్రసంగించారు. ఆ రోజు జ్ఞాపకార్థంగా ప్రతి ఏటా సివిల్ సర్వీసెస్ డేను ఏప్రిల్21న నిర్వహిస్తున్నారు. ఆ రోజున సివిల్ సర్వెంట్లను 'స్టీల్ ఫ్రేమ్ ఆఫ్ ఇండియా'గా పటేల్ పేర్కొన్నారు.
ఈ రోజున ఏం చేస్తారు?
జాతీయ పౌర సేవల దినోత్సవం నాడు ప్రజా సేవలో గణనీయమైన కృషి చేసిన సివిల్ సర్వెంట్లను ఎంపిక చేస్తారు. దేశవ్యాప్తంగా ఎంపిక చేసిన ఐఏఎస్, ఐపీఎస్‌లకు భారత ప్రధాన మంత్రి అవార్డ్స్ ఫర్ ఎక్సలెన్స్‌ను అందజేస్తారు. పౌరులకు ఉత్తమంగా సేవలను అందించిన సివిల్ సర్వెంట్లను సత్కరిస్తారు. సీనియర్లు వారి అనుభవాలను పంచుకుంటారు. రాష్ట్ర ప్రభుత్వాలు కూడా ఉత్తమంగా పని చేసిన అధికారులను ప్రశంసా పత్రాలను అందజేస్తాయి. కేంద్ర ప్రభుత్వం నిర్వహించే అవార్డుల కార్యక్రమం అడ్మినిస్ట్రేటివ్ రిఫార్మ్స్ అండ్ పబ్లిక్ గ్రీవెన్స్ డిపార్ట్మెంట్ (డీఏఆర్‌పీజీ), మినిస్ట్రీ ఆఫ్ పర్సనల్, పబ్లిక్ గ్రీవెన్స్, పెన్షన్స్ ఆధ్వర్యంలో జరుగుతుంది.
ఈ టైమ్ లైన్ ని షేర్ చేయండి