YSRCP: రాజ్యసభలో కేంద్రానికి వైసీపీ మద్దతు; 'దిల్లీ ఆర్డినెన్స్' ఆమోదం ఇక లాంచనమే
ఈ వార్తాకథనం ఏంటి
దిల్లీ ఆర్డినెన్స్ బిల్లుపై రాజ్యసభలో బీజేపీ నేతృత్వంలోని ఎన్డీయే సర్కార్‌కు మద్దతు ఇవ్వాలని ఆంధ్రప్రదేశ్ ముఖ్యమంత్రి జగన్ మోహన్ రెడ్డికి చెందిన వైఎస్సార్ కాంగ్రెస్ పార్టీ నిర్ణయించింది.
అలాగే మణిపూర్‌ సమస్యపై నరేంద్ర మోదీ ప్రభుత్వంపై లోక్‌సభలో ప్రవేశపెట్టిన అవిశ్వాస తీర్మానం విషయంలో కూడా కేంద్రానికి మద్దతు ఇవ్వనున్నట్లు వెల్లడించింది.
రాజ్యసభలో 9మంది, లోక్‌సభలో 22 మంది సభ్యులున్న వైఎస్ఆర్ కాంగ్రెస్ పార్టీ మద్దతు మోదీ ప్రభుత్వానికి కీలకం కానుంది.
రాజ్యసభలో బీజేపీ ప్రభుత్వానికి మోజార్టీ సభ్యులు లేదు. దీంతో రాజ్యసభలో వైసీపీ మద్దతు ఉంటేనే దిల్లీ ఆర్డినెన్స్ బిల్లు ఆమోదం పొందుతుంది.
మోదీ సర్కార్‌కు అనుకూలంగా వైసీపీ తీసుకున్న నిర్ణయంతో దిల్లీ ఆర్డినెన్స్ బిల్లు ఎలాంటి అడ్డంకులు లేకుండా ఆమోదం పొందనుంది.
దిల్లీ
మణిపూర్‌ పరిస్థితిపై సమగ్ర చర్చ జరగాలి: ప్రతిపక్షాల డిమాండ్
దిల్లీలో సేవలను నియంత్రించే లక్ష్యంతో కేంద్రం ఆర్డినెన్స్‌ను తీసుకొస్తుంది. నేషనల్ క్యాపిటల్ టెరిటరీ ఆఫ్ ఢిల్లీ గవర్నమెంట్ (సవరణ) బిల్లు స్థానంలో కేంద్రం కొత్త ఆర్డినెన్స్‌ను తీసుకొస్తోంది.
బ్యూరోక్రాట్ల బదిలీలు, నియామక అధికారాలు ఎన్నికైన దిల్లీ ప్రభుత్వానికి ఉంటాయని సుప్రీంకోర్టు తీర్పును ఇచ్చింది. దీనికి వ్యతిరేకంగా దిల్లీ బ్యూరోక్రాట్‌లపై నియంత్రణను కేంద్రానికి కల్పించే విధంగా ఈ ఆర్డినెన్స్‌ను రూపొందించారు.
రెండు అంశాల్లో ప్రభుత్వానికి అనుకూలంగా ఓటేస్తామని వైఎస్ఆర్ కాంగ్రెస్ పార్టీ నేత విజయసాయిరెడ్డి ఎన్డీటీవీకి తెలిపారు. అయితే అవిశ్వాస తీర్మానంపై చర్చ జరగాలని 'ఇండియా' డిమాండ్ చేస్తోంది.
మణిపూర్‌లో పరిస్థితిపై సమగ్ర చర్చ జరగాలని, ప్రధాని నరేంద్ర మోదీ ప్రకటన చేయాలని కాంగ్రెస్, ఇతర ప్రతిపక్షాలు డిమాండ్ చేస్తున్నాయి.