350 Variety Mangoes: ఒకే చెట్టులో 350 రకాల మామిడిపండ్లు! ఎలా సాధ్యమైంది? ఈ రైతు ప్రయాణాన్ని తెలుసుకోండి
ఈ వార్తాకథనం ఏంటి
ఆయన ఒక సాధారణ రైతు. చదువులో ఎలాంటి ప్రత్యేకత లేకపోయినా, వ్యవసాయంపై ఉండే ప్రేమ, పట్టుదల ఆయనను విజేతగా నిలిపింది.
చిన్నప్పటినుంచి వ్యవసాయమే ఆయన ప్రపంచం. ఏ ధనం లేకపోయినా, శ్రమ అనే తపస్సుతో పరిశోధనల దిశగా అడుగులు వేశారు.
ఫలితంగా ఆయనకు పద్మశ్రీ అవార్డు లభించింది. దేశవ్యాప్తంగా "ఇండియన్ మ్యాంగో మ్యాన్" అనే పేరుతో పేరుగాంచారు.
ఈ అద్భుత రైతు పేరు కలిముల్లా ఖాన్. ఆయన ఒక్క మామిడి చెట్టులోనే 350కన్నా ఎక్కువ రకాల మామిడిపండ్లను పండించగలిగారు. ఇది సాధారణంగా సాధ్యం కానిది. కాని ఈ రైతు అది నిజం చేశాడు.
వివరాలు
మామిడి చెట్లలో విభిన్నత ఎలా సాధ్యమవుతుంది?
మనకు సాధారణంగా తెలిసినట్లు, బంగినపల్లి చెట్టులో బంగినపల్లి మామిడిపండ్లే కాస్తాయి. ఎక్కడెక్కడో అంటుకట్టడం ద్వారా ఒక్కో రకాన్ని మాత్రమే కలపగలుగుతారు. కానీ ఒకే చెట్టులో 350 రకాల మామిడిపండ్లు కాయించడం నిజంగా అద్భుతం. కలిముల్లా ఖాన్ దీన్ని నిజం చేసి చూపించారు.
చెట్టును కన్నకూతురిలా చూసుకున్న రైతు
కలిముల్లా తాను పెంచిన మామిడి చెట్టును తన కన్న కూతురిలా భావించారు. ఆదరణ, శ్రద్ధతో నిదానంగా పెంచుతూ, ఏటా కొత్త రకాలను అంటుకడుతూ వెళ్లారు. చివరికి ఆ చెట్టు దేశంలోనే అత్యంత విలక్షణమైన మామిడి చెట్టుగా నిలిచింది. ప్రపంచ వ్యాప్తంగా దీనిపై చర్చలు జరిగాయి. దీనివల్ల కలిముల్లా ఖాన్‌కి అంతర్జాతీయ గుర్తింపు వచ్చింది.
వివరాలు
కలిముల్లా మొదటి అడుగు
ఉత్తర్‌ప్రదేశ్‌లోని మలిహాబాద్ ప్రాంతానికి చెందిన కలిముల్లా, చిన్నప్పటి నుంచే మామిడి తోటల్లో తిరుగుతూ పెరిగారు.
ఏడో తరగతిలోనే చదువు మానేసి, తాత మరణంతో తోటను చూసుకోవాల్సిన బాధ్యత తీసుకున్నారు. చదువుపై ఆసక్తి లేకపోయినా, మామిడి చెట్లపై అనురాగం మాత్రం చాలా ఉంది.
పునాది ఇలా...
1957లో కలిముల్లా ఒక ఆలోచనతో ప్రయోగం ప్రారంభించారు. ఒకే చెట్టులో ఏడు రకాల మామిడిపండ్లను పండించాలని. మొదట కొన్ని రకాల చెట్లను అంటుకట్టడం ద్వారా ఒక మొక్కను రూపొందించారు. కానీ అదే ఏడాది వర్షాల వల్ల మొక్క నశించింది. అయితే అది అయనకి ఒక అనుభవాన్ని మాత్రం మిగిల్చి వెళ్ళింది.
వివరాలు
ఎదురుదెబ్బలు మనిషికి విజయానికి బాటలు
ఆ అనుభవంతో కలిముల్లా ఖాన్ ఇంకా దూరం వెళ్లారు. 1987 నాటికి 22 ఎకరాల భూమిలో అనేక మామిడి చెట్లను ప్రయోగాత్మకంగా పెంచడం ప్రారంభించారు.
అన్ని చెట్లు కూడా అంటుకట్టినవే. ఆయన తాత వేసిన ఓ పాత చెట్టుపై కొనసాగిస్తూ, ఏటా కొత్త రకాల కొమ్మలు అంటిస్తూ వచ్చారు.
మొదట 5 రకాల పండ్లు కాసేవి. తరువాత 10... చివరికి 350కి చేరాయి. ప్రస్తుతం ఆ చెట్టు వయస్సు 125 సంవత్సరాలు.
అంటు కట్టే కళ
అంటు కట్టడం అంటే అనేక రకాల మామిడి చెట్ల కొమ్మలను ఒకే వేరు కాండంతో కలిపి పెంచడం.
ఇది ఓ శాస్త్రవిజ్ఞాన ప్రక్రియ. శ్రమ, ఓపిక అవసరం. కలిముల్లా దీనిని "ఒక కళ"గా అభివర్ణిస్తారు.
వివరాలు
సెలెబ్రిటీల పేర్లతో మామిడిపండ్లు
ఈ విధానంతో ఆల్ఫోన్సో, లాంగ్, కేసర్ వంటి పాపులర్ రకాలు, అలాగే స్వయంగా ఆయన అభివృద్ధి చేసిన హైబ్రిడ్ రకాలు కూడా ఉన్నాయి.
అయన కనిపెట్టిన మామిడిపండ్లకు విభిన్నంగా సెలెబ్రిటీల పేర్లు పెట్టారు. ఉదాహరణకు:
సచిన్ టెండుల్కర్ - ఒక మామిడి రకం పేరు
ఐశ్వర్యా రాయ్ - మరో మామిడి రకం
అమితాబ్ బచ్చన్ - పొడవైన తోతాపురి మామిడికి
నరేంద్ర మోదీ - నారింజ రంగు మామిడిపండుకు
వివరాలు
కుటుంబ సహకారం
ప్రస్తుతం కలిముల్లా ఖాన్ 84 ఏళ్ల వయస్సులో ఉన్నారు. ఆయన కొడుకు ఇంటర్ చదువుతూనే తోట పనిలో చేరిపోయారు.
ప్రస్తుతం వారు కలసి 22 ఎకరాల మామిడి తోట నిర్వహిస్తున్నారు. తోటను తెగుళ్ల నుంచి కాపాడడం, నీరు సరైన మోతాదులో అందించటం, వాతావరణానికి అనుగుణంగా సంరక్షించటం - అన్నీ కలసి మామిడి పంటను నిలబెట్టే బాధ్యత తీసుకుంటున్నారు.
వాతావరణ ప్రభావం
వర్షపాతం తక్కువగా ఉన్నప్పుడు మామిడిపండ్లు చిన్నవిగా ఉంటాయి. నీరు సరిపడిగా ఉంటే పెద్దవిగా మారతాయి. కానీ తేమ ఎక్కువగా ఉన్నప్పుడు ఫంగస్ దాడులు జరగవచ్చు. వాటిని శుభ్రపరచడం వంటి పనులు కలిముల్లా కుటుంబం చేస్తూ వస్తున్నారు.
వివరాలు
ప్రపంచవ్యాప్తంగా గుర్తింపు
ఒకే చెట్టులో 350 రకాల మామిడిపండ్లను పండించడం విశేషమైన విషయం. దీనిని చూసేందుకు విదేశాల నుంచి - ఇరాన్, దుబాయ్ వంటి దేశాల నుంచి రైతులు వచ్చేవారంటూ కలిముల్లా చెబుతున్నారు. ఆయన చెట్టులోని కొన్ని పండ్లు యాపిల్‌లా కూడా కనిపిస్తాయని అంటున్నారు.
మామిడి - మన సంస్కృతిలో భాగం
మామిడి పండు మన ఆహారంలో మాత్రమే కాదు, సంస్కృతిలో, సాంప్రదాయాలలో భాగమై ఉంది.
అలాంటి పండును విభిన్నంగా, శాస్త్రీయంగా, కళాత్మకంగా పెంచిన కలిముల్లా ఖాన్ నిజంగా దేశానికి గర్వకారణం.
ఈ కథ అటు రైతన్నలకూ, ఇటు పరిశోధనకు ఆసక్తి ఉన్నవారికీ ఒక ప్రేరణ. చదువు లేకపోయినా విజయం సాధించవచ్చని కలిముల్లా ఖాన్ జీవితం చూపిస్తుంది.