ISRO: ఇస్రో మరో ఘనత.. వికాస్‌ ఇంజిన్‌ రీస్టార్ట్‌ పరీక్ష విజయవంతం
ఈ వార్తాకథనం ఏంటి
భారత అంతరిక్ష పరిశోధన సంస్థ (ఇస్రో) మరో కీలక మైలురాయిని చేరుకుంది. మహేంద్రగిరిలోని ప్రొపల్షన్ కాంప్లెక్స్‌లో వికాస్‌ లిక్విడ్‌ ఇంజిన్‌ పునఃపరీక్ష విజయవంతమైందని ఇస్రో శనివారం వెల్లడించింది. ఇస్రో ప్రయోగ వాహక నౌకలకు లిక్విడ్‌ స్టేజ్‌లకు శక్తినిచ్చే వికాస్‌ ఇంజిన్‌ను 60 సెకన్లు, ఆపై 120 సెకన్ల పాటు ఆపివేసి, అనంతరం ఏడు సెకన్ల పాటు మళ్లీ మండించారు. పరీక్షలో అన్ని పారామితులు సాధారణంగా ఉన్నట్లు ఇస్రో స్పష్టం చేసింది. ఇంజిన్‌ పనితీరును మరింత మెరుగుపరిచేందుకు అదనపు పరీక్షలు నిర్వహించనున్నట్లు ఇస్రో తెలిపింది. ఇటీవల ఇస్రో నింగిలో రెండు ఉపగ్రహాలను విజయవంతంగా అనుసంధానం చేసి భారత అంతరిక్ష చరిత్రలో ఒక కొత్త అధ్యాయాన్ని ప్రారంభించింది.
Details
అంతర్జాతీయ స్థాయిలో భారత ప్రతిష్టను మరింత పెంచిన ఇస్రో
ఇస్రో ప్రతిష్ఠాత్మకంగా చేపట్టిన స్పేస్‌ డాకింగ్‌ ఎక్స్‌పరిమెంట్‌ (స్పేడెక్స్‌) విజయవంతమైంది. ఈ ప్రయోగం ద్వారా నింగిలో ఉపగ్రహాలను డాకింగ్‌ చేయగల సామర్థ్యం కలిగిన నాలుగో దేశంగా భారత్‌ అవతరించింది. ఈ డాకింగ్‌ ప్రయోగం విజయంతో, అమెరికా, రష్యా, చైనా దేశాల సరసన భారతదేశం చేరి గర్వకారణంగా నిలిచింది. ఇస్రో ప్రతిష్ఠాత్మకంగా చేపట్టిన ఈ ప్రయోగం భారత అంతరిక్ష పరిశోధనలో మైలురాయిగా నిలుస్తుంది. వికాస్‌ ఇంజిన్‌ పనితీరును మెరుగుపర్చే దిశగా మరిన్ని పరీక్షలు నిర్వహించేందుకు ప్రణాళికలు రూపొందిస్తున్నట్లు ఇస్రో పేర్కొంది. ఇదే దిశగా ఇస్రో తన పునాదులను మరింత బలపరుస్తూ, అంతర్జాతీయ స్థాయిలో భారత ప్రతిష్ఠను మరింతగా పెంచేందుకు కృషి చేస్తోంది.