Meta AI: సెలబ్రిటీల ఫొటోలు దుర్వినియోగం.. వివాదంలో మెటా
ఈ వార్తాకథనం ఏంటి
మార్క్ జూకర్ బర్గ్ ఆధ్వర్యంలోని టెక్నాలజీ దిగ్గజం మెటా రూపొందించిన కృత్రిమ మేధా సహాయకుడు 'మెటా ఏఐ' (Meta AI) చాట్‌బాట్ల వినియోగం పై కొత్త వివాదం రేగింది. రాయిటర్స్‌ నిర్వహించిన తాజా పరిశోధనలో, మెటా సంస్థ యూజర్లతో చాట్ చేయడానికి పేరుగాంచిన సెలబ్రిటీల పేర్లు, వారి ఫొటోలను అనుమతి లేకుండానే వాడుతూ, పేరడీ చాట్‌బాట్లను అభివృద్ధి చేసినట్లు బయటపడింది. ఈ అంశం ఇప్పుడు తీవ్ర చర్చనీయాంశమైంది. మెటా ఏఐ చాట్‌బాట్లు ప్రస్తుతం వాట్సాప్, ఇన్‌స్టాగ్రామ్‌, ఫేస్‌ బుక్‌ మెసెంజర్‌ ప్లాట్‌ఫారమ్‌లలో అందుబాటులో ఉన్నాయి. ఈ చాట్‌బాట్లలో పాప్‌స్టార్‌ టేలర్‌ స్విఫ్ట్‌ (Taylor Swift),సెలీనా గోమెజ్‌,స్కార్లెట్‌ జాన్సన్‌,అన్నే హాత్వే వంటి ప్రముఖుల పేర్లు,రూపాలను వినియోగించారు.
వివరాలు
టేలర్‌ స్విఫ్ట్‌ పేరుతో మూడు వేర్వేరు బాట్లు
ముఖ్యంగా టేలర్‌ స్విఫ్ట్‌ పేరుతో మూడు వేర్వేరు బాట్లను సృష్టించినట్లు రాయిటర్స్‌ గుర్తించింది. అవన్నీ మెటా ఉద్యోగుల ద్వారానే రూపొందించబడ్డాయని కూడా తెలిసింది. ఈ బాట్ల వినియోగం కొన్ని వారాలపాటు కొనసాగిందని రిపోర్టులో పేర్కొంది. ఈ క్రమంలో ఆ చాట్‌బాట్లు తామే ప్రముఖులమని పేర్కొంటూ యూజర్లతో సన్నిహిత సంభాషణలు జరిపి, వ్యక్తిగతంగా కలవమని ఆహ్వానాలు కూడా పంపేవని బయటపడింది. అంతేకాక, కొన్నిసార్లు సెలబ్రిటీలకు సంబంధించిన అసభ్యకరమైన ఫొటోలు కూడా స్వయంచాలకంగా తయారవడం మరింత ఆందోళన కలిగించే అంశంగా మారింది.
వివరాలు
ఇలాంటి పరిస్థితి అసలు జరగకూడదు: ఆండీ స్టోన్
దీనిపై మెటా ప్రతినిధి ఆండీ స్టోన్ స్పందిస్తూ, "ఇలాంటి పరిస్థితి అసలు జరగకూడదు" అని అన్నారు. ప్రముఖుల చిత్రాలను రూపొందించేందుకు అనుమతులు ఇచ్చామని, అయితే అసభ్యకరమైన లేదా అనుచిత కంటెంట్‌ సృష్టించడం తమ కంపెనీ నిబంధనలకు వ్యతిరేకమని స్పష్టం చేశారు. ఈ మధ్యకాలంలో రాయిటర్స్‌ తమ కథనాన్ని ప్రచురించే ముందు నుంచే మెటా డజన్లకొద్దీ పేరడీ బాట్లను తొలగించినట్లు సమాచారం. అయితే, ఆ అంశంపై పూర్తి స్థాయి స్పందన ఇవ్వడాన్ని ఆండీ స్టోన్ నిరాకరించారు.