Chatgpt: చాట్‌జీపీటీలో పేరెంటల్ కంట్రోల్స్ ప్రవేశపెట్టనున్న ఓపెన్ఏఐ.. పిల్లలు తీవ్ర ఒత్తిడిలో ఉంటే తల్లిదండ్రులకు నోటిఫికేషన్
ఈ వార్తాకథనం ఏంటి
ప్రపంచవ్యాప్తంగా విస్తృతంగా వాడబడుతున్న కృత్రిమ మేధస్సు (ఏఐ) సాధనం చాట్‌జీపీటీ విషయంలో టీనేజర్ల భద్రతకు ప్రాధాన్యం ఇస్తూ,దాని మాతృసంస్థ ఓపెన్ఏఐ ఒక కీలక నిర్ణయం తీసుకుంది. ఇకపై, తమ పిల్లలు చాట్‌జీపీటీ వాడేటప్పుడు వారు మానసిక ఒత్తిడిని ఎదుర్కొంటున్నారని గుర్తించిన సందర్భంలో, తల్లిదండ్రులకు ఆ సమాచారం చేరేలా ప్రత్యేక పేరెంటల్ కంట్రోల్ ఫీచర్లు అందించనున్నట్టు సంస్థ వెల్లడించింది. టెక్నాలజీ రంగంలో ఇది ఒక ముఖ్యమైన ముందడుగుగా భావిస్తున్నారు.
వివరాలు
టీనేజర్ల ఖాతాలకు తల్లిదండ్రుల అకౌంట్ లింక్ చేసుకునే సౌకర్యం
ఈ కొత్త సదుపాయంలో భాగంగా, తల్లిదండ్రులు తమ పిల్లల (13 సంవత్సరాలు లేదా అంతకంటే ఎక్కువ వయసు కలిగిన వారి) చాట్‌జీపీటీ ఖాతాలను ఈమెయిల్ ఆహ్వానం ద్వారా తమ ఖాతాలకు అనుసంధానం చేసుకోవచ్చు. ఇలా లింక్ చేసిన వెంటనే పిల్లల వయసుకు తగ్గ భద్రతా సెట్టింగులు ఆటోమేటిక్‌గా యాక్టివ్ అవుతాయి. అంతేకాదు, చాట్ హిస్టరీ, మెమరీ వంటి ఫీచర్లను అవసరంలేదని భావిస్తే ఆఫ్ చేసుకునే అవకాశం కూడా ఉంటుంది. అదనంగా, ఎక్కువసేపు వాడకుండా మధ్యలో విరామం తీసుకోవాలని సూచించే ఇన్-యాప్ రిమైండర్‌లు కూడా ఈ అప్‌డేట్‌లో అందించబడతాయి.
వివరాలు
ఈ ఏడాదిలోనే కొత్త ఫీచర్లు అందుబాటులోకి వచ్చే అవకాశం
ఇవే కాకుండా,ఈ అప్‌డేట్‌లో భాగంగా ఓపెన్ఏఐ మరో ముఖ్యమైన సాంకేతికతను ప్రవేశపెడుతోంది. వినియోగదారులు అత్యంత ఆందోళన కలిగించే లేదా సున్నితమైన అంశాలపై చర్చిస్తున్నారని సిస్టమ్ గుర్తిస్తే, అప్పుడు సాధారణ చాట్ మోడల్‌ నుంచి ఆటోమేటిక్‌గా 'జీపీటీ-5 థింకింగ్' వంటి అధునాతన రీజనింగ్ మోడల్‌కు సంభాషణను మార్చేస్తుంది. దీని వల్ల వినియోగదారులకు మరింత స్పష్టమైన, సహాయకరమైన సమాధానాలు లభిస్తాయని సంస్థ వివరించింది. ఈ ఫీచర్లన్నింటినీ ఈ సంవత్సరంలోనే పూర్తిస్థాయిలో అందుబాటులోకి తీసుకురావడమే ఓపెన్ఏఐ లక్ష్యం. అయితే అందుకు ముందు, సుమారు 120 రోజుల పాటు ప్రివ్యూ రూపంలో ఈ ఫీచర్లను వినియోగదారులకు అందించి, వారి అభిప్రాయాల ఆధారంగా తగిన మార్పులు చేయనున్నట్టు ప్రకటించింది.