ChatGPT: ప్రపంచవ్యాప్తంగా చాట్‌జీపీటీ సేవలకు అంతరాయం..?
ఈ వార్తాకథనం ఏంటి
ఓపెన్‌ఏఐ సంస్థకు చెందిన ఏఐ చాట్‌బాట్ అయిన చాట్‌జీపీటీ (ChatGPT) సాధ్యమైనంత క్లిష్టమైన ప్రశ్నకైనా సులభంగా సమాధానాలు అందించే సామర్థ్యాన్ని కలిగి ఉంది. ఈ కారణంగా చాలా మంది వినియోగదారులు దీన్ని విస్తృతంగా ఉపయోగించేందుకు ఆసక్తి చూపుతున్నారు. అయితే ప్రస్తుతం ఈ సేవలలో అంతరాయం ఏర్పడుతున్నట్లు సమాచారం వెలుగులోకి వచ్చింది. ప్రపంచవ్యాప్తంగా, ముఖ్యంగా భారత్‌ లోని అనేక యూజర్లు ఈ సమస్యలను ఎదుర్కొంటున్నారు. 'డౌన్‌డిటెక్టర్‌' అనే వెబ్‌సైట్‌ ఇచ్చిన సమాచారం ప్రకారం,చాట్‌జీపీటీకి ప్రశ్నలు పంపినప్పటికీ, అవి స్వీకరించబడటం లేదు. కొన్ని సందర్భాల్లో ప్రశ్నలు స్వీకరించినా,సమాధానాలు ఆలస్యంగా అందుతున్నాయి. ఇదే కాకుండా మరికొన్ని సాంకేతిక లోపాలు కూడా ఎదురవుతున్నాయని యూజర్లు వెల్లడించారు.
వివరాలు
1,000 మందికిపైగా ఈ అంశంపై ఫిర్యాదులు నమోదు
ఇప్పటివరకు 1,000 మందికిపైగా ఈ అంశంపై ఫిర్యాదులు నమోదు చేశారు. ముఖ్యంగా యాప్ ఉపయోగించే సమయంలో సమాధానాలు ఆలస్యంగా రావడం గురించి 93 శాతానికి పైగా వినియోగదారులు ఫిర్యాదులు చేశారు. అలాగే 6 శాతం మంది లాగిన్ సమస్యలు, నెట్‌వర్క్ లోపాలు, ఇతర యాప్‌కు సంబంధించిన ఇబ్బందులను ఎదుర్కొంటున్నట్లు తెలిపారు. వినియోగదారులు ప్రశ్నవేయగానే "ఏదో తప్పు జరిగినట్లుగా అనిపిస్తోంది" అనే సందేశం కనిపిస్తోందని పేర్కొన్నారు. కొన్నిసార్లు "నెట్‌వర్క్ లోపం సంభవించింది.దయచేసి మీ కనెక్షన్‌ను మళ్లీ తనిఖీ చేసి ప్రయత్నించండి. సమస్య కొనసాగితే help.openai.com అనే సహాయ కేంద్రాన్ని సంప్రదించండి" అనే సూచన కూడా వస్తోందని తెలిపారు. అనేకసార్లు ప్రయత్నించినప్పటికీ అదే సమస్య తిరిగి తిరిగి వస్తోందని యూజర్లు తమ ఫిర్యాదుల్లో వివరించారు.