Cristiano Ronaldo : రొనాల్డో ఫ్యాన్స్కు నిరాశ.. 2026 ఫిఫా వరల్డ్ కప్ తర్వాత వీడ్కోలు?
ఈ వార్తాకథనం ఏంటి
పోర్చుగల్ ఫుట్ బాల్ దిగ్గజం క్రిస్టియానో రొనాల్డో అంతర్జాతీయ ప్రయాణం ముగింపుకు చేరువలో ఉందనే ఊహాగానాలు మరోసారి బలపడుతున్నాయి. ఈ చర్చలకు మరింత ఊతమిస్తూ ఆయన సోదరి కాటియా అవెయిరో చేసిన వ్యాఖ్యలు ప్రస్తుతం ఫుట్బాల్ వర్గాల్లో హాట్ టాపిక్గా మారాయి. ప్రస్తుతం 41 ఏళ్ల వయస్సులో ఉన్న రొనాల్డోకు మైదానానికి వీడ్కోలు చెప్పే సమయం దగ్గరపడిందని ఆమె అభిప్రాయపడ్డారు. ఇదే సమయంలో పోర్చుగల్ జట్టు వరల్డ్ కప్ రౌండ్ ఆఫ్ 32లో క్రొయేషియాతో తలపడనున్న నేపథ్యంలో ఈ వ్యాఖ్యలు మరింత ప్రాధాన్యం సంతరించుకున్నాయి.
వివరాలు
2026 వరల్డ్ కప్నే చివరి టోర్నీగా పేర్కొన్న కాటియా..
ఇటీవల ఉజ్బెకిస్తాన్తో జరిగిన మ్యాచ్లో అల్ నస్ర్ తరఫున రొనాల్డో రెండు అద్భుతమైన గోల్స్ నమోదు చేసినప్పటికీ, ఆయన గతంతో పోలిస్తే మైదానంలో వేగం తగ్గిందని కొందరు విమర్శలు చేస్తున్నారు. ఈ విమర్శలపై స్పందించిన ఆయన సోదరి కాటియా అవెయిరో ఒక క్రీడా ఛానెల్కు ఇచ్చిన ఇంటర్వ్యూలో విమర్శకులకు గట్టిగా బదులిచ్చారు. "రొనాల్డో ఆటను ఇంకా ఎంతకాలం చూడగలరో అంతవరకూ ఆస్వాదించండి. ఎందుకంటే ఆ ప్రయాణం త్వరలోనే ముగియనుంది. నాకు అత్యంత విశ్వసనీయ వర్గాల నుంచి అందిన సమాచారం ప్రకారం 2026 ఫిఫా వరల్డ్ కప్నే ఆయన అంతర్జాతీయ కెరీర్లో చివరి టోర్నీ కానుంది. అదే ఆయన 'లాస్ట్ డాన్స్'," అని కాటియా వెల్లడించారు.
వివరాలు
రొనాల్డోపై విమర్శలకు సోదరి ఘాటు కౌంటర్..
రెండు దశాబ్దాలకుపైగా ప్రపంచ ఫుట్బాల్పై తన ముద్ర వేసిన రొనాల్డోపై వస్తున్న విమర్శలను కాటియా తీవ్రంగా ఖండించారు. "నిజమైన ఫుట్బాల్ అభిమానులు రొనాల్డోను అభిమానించకుండా ఉండలేరు. తీవ్ర పేదరికం నుంచి ఎన్నో కష్టాలను ఎదుర్కొంటూ మా కుటుంబం ఈ స్థాయికి చేరుకుంది. మా తల్లి ఎదుర్కొన్న ఇబ్బందులతో పోలిస్తే ఇప్పుడు వస్తున్న విమర్శలు చాలా చిన్నవి. అలాంటి వ్యాఖ్యలు మా ఆనందాన్ని ఏమాత్రం తగ్గించలేవు. గత ఇరవై ఏళ్లలో రొనాల్డో సాధించిన విజయాలు మా కుటుంబానికి గర్వకారణంగా నిలిచాయి," అని ఆమె పేర్కొన్నారు.
వివరాలు
సహచర ఆటగాళ్ల ప్రదర్శనపైనా అసంతృప్తి..
ఎప్పటికప్పుడు రొనాల్డోకు అండగా నిలిచే కాటియా, ఈ సందర్భంగా పోర్చుగల్ జట్టు సహచర ఆటగాళ్ల ఆటతీరుపైనా అసహనం వ్యక్తం చేశారు. డీఆర్ కాంగోతో జరిగిన మ్యాచ్ 1-1తో డ్రాగా ముగియడంపై స్పందించిన ఆమె, బ్రూనో ఫెర్నాండెజ్ ప్రదర్శనను విమర్శించారు. మాంచెస్టర్ యునైటెడ్ తరఫున చూపించే స్థాయి ఆటను ఫెర్నాండెజ్ దేశం కోసం ప్రదర్శించడం లేదని ఆమె అన్నారు. రొనాల్డోను మాత్రమే విమర్శించే వారు మిగతా ఆటగాళ్ల వైఫల్యాలను ఎందుకు పట్టించుకోవడం లేదని కూడా ప్రశ్నించారు.
వివరాలు
2030 ప్రపంచకప్ ఆశలకు గట్టి ఎదురుదెబ్బ..
గతంలో పోర్చుగల్ ప్రధాన కోచ్ రాబర్టో మార్టినెజ్ మాట్లాడుతూ, రొనాల్డో ఫిట్నెస్ను బట్టి 2030 ప్రపంచకప్లోనూ ఆడే అవకాశం పూర్తిగా కొట్టిపారేయలేమని వ్యాఖ్యానించారు. అయితే పోర్చుగీస్ ఫుట్బాల్ ఫెడరేషన్ అధ్యక్షుడు పెడ్రో ప్రోయెంకా మాత్రం ఆ అవకాశాలు చాలా స్వల్పమని, 2030లో రొనాల్డో మైదానంలో కనిపించడం దాదాపు అసాధ్యమేనని ఇప్పటికే స్పష్టం చేశారు. ఇప్పుడు కాటియా చేసిన తాజా వ్యాఖ్యలతో రొనాల్డో అంతర్జాతీయ కెరీర్ 2026 ఫిఫా వరల్డ్ కప్తో ముగియనున్నట్లు అభిమానులు భావిస్తున్నారు. ప్రపంచ ఫుట్బాల్ చరిత్రలో అత్యుత్తమ ఆటగాళ్లలో ఒకరిగా గుర్తింపు పొందిన క్రిస్టియానో రొనాల్డోకు ఘనమైన వీడ్కోలు లభించాలని పోర్చుగల్ అభిమానులు ఆశిస్తున్నారు.