టీ 20 ప్రపంచ కప్ గెలిచిన టీమిండియాపై డబ్బుల వర్షం
T20 world cup prize money: టీ20 ప్రపంచకప్- 2024 ఛాంపియన్ టీమ్ ఇండియాకు బంపర్ ప్రైజ్ మనీ లభించింది. అదే సమయంలో రన్నరప్‌గా నిలిచిన దక్షిణాఫ్రికా జట్టుపై కూడా కాసుల వర్షం కురిసింది. ఈ మెగా ఈవెంట్ కోసం ఐసీసీ ఇప్పటికే ప్రైజ్ మనీ ప్రకటించింది. T20 ప్రపంచ కప్ 2024 కోసం మొత్తం 11.25 మిలియన్ డాలర్లు (సుమారు రూ. 93.51 కోట్లు) ప్రైజ్ మనీగా వెల్లడించింది. ఈ ప్రైజ్ మనీలో భారత జట్టు సుమారు రూ. 20.36 కోట్లను అందుకుంది. టీ20 ప్రపంచకప్ చరిత్రలో తొలిసారి విజేత జట్టుకు ఇంత మొత్తం లభించింది. రన్నరప్‌గా నిలిచిన దక్షిణాఫ్రికాకు సుమారు రూ. 10.64 కోట్లు (1.28 మిలియన్లు డాలర్లు) అందాయి.
సెమీ ఫైనలిస్టులకు ఎంతంటే?
సెమీ-ఫైనల్‌కు చేరుకున్న ఇతర రెండు జట్లు అయిన ఆఫ్ఘనిస్తాన్, ఇంగ్లండ్‌లకు దాదాపు రూ. 6.54 కోట్లు(787,500 డాలర్ల) అందించారు. ఈసారి టీ20 ప్రపంచకప్‌లో 20 జట్లు పాల్గొంటున్నాయి. ప్రతి జట్టుకు ఐసీసీ కొంత మొత్తాన్ని ఇచ్చింది. సూపర్-8(రెండో రౌండ్) దాటి ముందుకు సాగని జట్లకు ఒక్కొక్కటి 382,500 డాలర్లు (సుమారు రూ. 3.17 కోట్లు) ఐసీసీ అందజేసింది. తొమ్మిది నుంచి 12వ స్థానంలో నిలిచిన జట్లకు ఒక్కొక్కటి 247,500 డాలర్లు (దాదాపు రూ. 2.05 కోట్లు)లభించాయి. 13నుంచి 20వ ర్యాంక్‌లో ఉన్న జట్లు ఒక్కొక్కటి 225,000 డాలర్లు (సుమారు రూ.1.87 కోట్లు) అందుకున్నాయి. ఇది కాకుండా, మ్యాచ్‌లో (సెమీ-ఫైనల్స్, ఫైనల్స్ మినహా) గెలిస్తే జట్లకు అదనంగా 31,154డాలర్లు (సుమారు రూ. 25.89లక్షలు) లభించాయి.
