Sourav Ganguly: ఢిల్లీ క్యాపిటల్స్‌ పగ్గాలు గంగూలీ చేతికి.. ఐపీఎల్‌లో తొలిసారి హెడ్‌ కోచ్‌గా!
ఈ వార్తాకథనం ఏంటి
టీమిండియా మాజీ కెప్టెన్‌ సౌరబ్ గంగూలీకి ఢిల్లీ క్యాపిటల్స్‌ కీలక బాధ్యత అప్పగించింది. ఐపీఎల్‌-2027 సీజన్‌ కోసం జట్టు హెడ్‌ కోచ్‌గా గంగూలీని నియమించింది. 2019 నుంచి ఢిల్లీ క్యాపిటల్స్‌తో అనుబంధం కొనసాగిస్తున్న గంగూలీ.. ఇప్పటివరకు ఫ్రాంచైజీలో పలు కీలక బాధ్యతలు నిర్వర్తించాడు. అయితే ఐపీఎల్‌లో హెడ్‌ కోచ్‌గా వ్యవహరించడం ఇదే తొలిసారి.
వివరాలు
గంగూలీకి ప్రమోషన్‌..
గతంలో ఢిల్లీ క్యాపిటల్స్‌ పురుషుల, మహిళల జట్లకు గంగూలీ డైరెక్టర్‌ ఆఫ్‌ క్రికెట్‌గా పనిచేశాడు. తాజాగా హెడ్‌ కోచ్‌గా బాధ్యతలు చేపట్టడంతో జట్టులో అతడి పాత్ర మరింత కీలకంగా మారనుంది.
గత రెండు సీజన్లుగా ఢిల్లీకి కోచ్‌గా వ్యవహరించిన హేమంగ్‌ బదానీ స్థానంలో గంగూలీ బాధ్యతలు స్వీకరించనున్నాడు.
అదే సమయంలో బౌలింగ్‌ కోచ్‌ మునాఫ్‌ పటేల్‌, టీమ్‌ డైరెక్టర్‌ వేణుగోపాల్‌ రావు, అసిస్టెంట్‌ కోచ్‌ ఇయాన్‌ బెల్‌ను కొనసాగించకూడదని ఢిల్లీ క్యాపిటల్స్‌ నిర్ణయించింది.
2026 సీజన్‌లో ఢిల్లీ క్యాపిటల్స్‌ ఆరో స్థానంలో నిలిచింది. అంతకుముందు సీజన్‌లో ఐదో స్థానంతో సరిపెట్టుకుంది.
వివరాలు
తన సపోర్ట్‌ స్టాఫ్‌ను తీసుకురానున్న గంగూలీ?
హెడ్‌ కోచ్‌గా బాధ్యతలు చేపట్టిన గంగూలీ తనకు అనుకూలమైన సపోర్ట్‌ స్టాఫ్‌ను తీసుకురానున్నట్లు తెలుస్తోంది.
టీమిండియా మాజీ ఆల్‌రౌండర్‌ యువరాజ్‌ సింగ్‌ కూడా అతడి కోచింగ్‌ బృందంలో చేరే అవకాశం ఉందన్న ప్రచారం జరుగుతోంది.
గతేడాది దక్షిణాఫ్రికా టీ20 లీగ్‌ (SA20)లో ప్రిటోరియా క్యాపిటల్స్‌కు గంగూలీ హెడ్‌ కోచ్‌గా వ్యవహరించాడు. అతడి పర్యవేక్షణలో ప్రిటోరియా క్యాపిటల్స్‌ ఫైనల్‌కు చేరింది.
వివరాలు
బలమైన జట్టును నిర్మించడమే లక్ష్యం
ఐపీఎల్‌లో హెడ్‌ కోచ్‌గా బాధ్యతలు చేపట్టడంపై గంగూలీ సంతోషం వ్యక్తం చేశాడు. ఢిల్లీ క్యాపిటల్స్‌ తనకు ఎంతో ప్రత్యేకమైన ఫ్రాంచైజీ అని పేర్కొన్నాడు.
జట్టులో ప్రతిభావంతులైన ఆటగాళ్లు ఉన్నారని.. కొత్త సీజన్‌లో బలమైన, భయపడని జట్టును నిర్మించడమే తన లక్ష్యమని చెప్పాడు.
కెప్టెన్‌ అక్షర్‌ పటేల్‌, సీనియర్‌ బ్యాటర్‌ కేఎల్‌ రాహుల్‌తో కూడిన నాయకత్వ బృందంతో గంగూలీ కలిసి పనిచేయనున్నాడు.
2026 ఐపీఎల్‌ అనంతరం లక్నో సూపర్‌ జెయింట్స్‌ నుంచి రిషభ్‌ పంత్‌ను తిరిగి ఢిల్లీ క్యాపిటల్స్‌లోకి తీసుకురావడంతో జట్టు బ్యాటింగ్‌ విభాగంలో అనుభవం కూడా పెరిగింది.
వివరాలు
గతేడాది నుంచే చర్చ..
గంగూలీ గతేడాదే ఢిల్లీ క్యాపిటల్స్‌ హెడ్‌ కోచ్‌గా బాధ్యతలు చేపట్టే అవకాశం ఉందనే చర్చ జరిగింది. అయితే అప్పట్లో అది కార్యరూపం దాల్చలేదు.
ఇప్పుడు ఆ చర్చలకు తెరదించుతూ గంగూలీ అధికారికంగా హెడ్‌ కోచ్‌ పదవిలోకి వచ్చాడు.
ఢిల్లీ క్యాపిటల్స్‌ ఛైర్మన్‌, సహ యజమాని పార్థ్‌ జిందాల్‌ కూడా గంగూలీ నియామకాన్ని స్వాగతించాడు.
ఢిల్లీ క్యాపిటల్స్‌ కుటుంబంలో గంగూలీ ఎప్పటినుంచో కీలక సభ్యుడని పేర్కొన్నాడు. అతడి అనుభవం, నాయకత్వం కొత్త బాధ్యతలో జట్టుకు ఎంతో ఉపయోగపడతాయని చెప్పాడు.
వివరాలు
ఐపీఎల్‌-2027 వేలంపై గంగూలీ పర్యవేక్షణ
ఐపీఎల్‌-2027 వేలానికి ముందు జట్టు ప్రణాళికలను గంగూలీ పర్యవేక్షించనున్నాడు.
వచ్చే సీజన్‌ తర్వాత మెగా వేలం జరగనున్న నేపథ్యంలో జట్టులో భారీ మార్పులు ఉండే అవకాశం తక్కువగా ఉంది.
ఐపీఎల్‌-2027 కోసం హెడ్‌ కోచ్‌ల మార్పుల్లో గంగూలీ నియామకం మరో కీలక పరిణామంగా నిలిచింది.
ఇటీవలే చెన్నై సూపర్‌ కింగ్స్‌ జహీర్‌ ఖాన్‌ను హెడ్‌ కోచ్‌గా నియమించింది. దీంతో 19 ఏళ్లుగా సీఎస్‌కే కోచ్‌గా ఉన్న స్టీఫెన్‌ ఫ్లెమింగ్‌ శకం ముగిసింది.