WTC Final 2023 విజేతకి భారీ ప్రైజ్‌మనీ.. ప్రకటించిన ఐసీసీ
వరల్డ్ టెస్టు ఛాంపియన్‌షిప్ ప్రైజ్‌మనీ వివరాలను అంతర్జాతీయ క్రికెట్ కౌన్సిల్ శుక్రవారం వెల్లడించింది. ఛాంపియన్ గా నిలిచే జట్టుతో పాటు రన్నరప్ నుంచి 9వ స్థానం వరకు నిలిచే జట్లకు అందిందే నగదు వివరాలను ప్రకటించింది. ఛాంపియన్ గా నిలిచిన జట్టుకు రూ.13.24 కోట్లను ప్రైజ్‌మనీ అందుకుంటుంది. రన్నరప్ జట్టుకు రూ.6.5 కోట్లు దక్కనుండగా.. మూడో స్థానంలో నిలిచిన జట్టుకు రూ.3.6కోట్లు, నాలుగో స్థానంలో నిలిచిన జట్టుకు రూ.2.8 కోట్లను ఐసీసీ అందజేయనుంది. ఐదో ప్లేస్ లో నిలిచిన జట్టుకు రూ.1.6 కోట్లు దక్కనుండగా.. 7, 6, 8, 9వ స్థానాల్లో నిలిచిన జట్టుకు రూ.82 లక్షలు పారితోషకం అందనుంది.
జూన్ 7న డబ్ల్యూటీసీ ఫైనల్ మ్యాచ్ ప్రారంభం
జూన్ 7 నుంచి 11వ తేదీ వరకూ ఇండియా, ఆస్ట్రేలియా మధ్య డబ్ల్యూటీసీ ఫైనల్ మ్యాచ్ జరగనుంది. జూన్ 12వ తేదీని రిజర్వ్ డేగా ప్రకటించారు. గెలుపొందిన జట్టుకు గదతో పాటు భారీ ప్రైజ్ మనీ కూడా దక్కుతుందని ఐసీసీ నేడు స్పష్టం చేసింది. అయితే 2021లో జరిగిన ఫైనల్లో న్యూజిలాండ్, ఇండియాను ఓడించి విజేతగా నిలిచిన విషయం తెలిసిందే. అప్పట్లో ఆ జట్టుకు గదతో పాటు 16లక్షల డాలర్ల ప్రైజ్ మనీ లభించింది. రన్నరప్ నిలిచిన ఇండియా జట్టుకు 8 లక్షల డాలర్లు దక్కాయి. ఇప్పటికే డబ్య్లూటీసీ ఫైనల్ కోసం టీమిండియా సాధన మొదలు పెట్టింది. ఈ ఫైనల్ కోసం ఇప్పటికే తొలి బ్యాచ్ ఇంగ్లండ్ కు వెళ్లిన విషయం తెలిసిందే.
