Shubman Gill: ఆస్ట్రేలియా-భారత్‌.. రెండో టెస్టుకు కూడా శుభ్మన్ గిల్ దూరమయ్యే అవకాశం
ఇంట్రాస్క్వాడ్‌ వార్మప్ మ్యాచ్‌లో శుభమన్ గిల్ వేలికి గాయం అయిన విషయం తెలిసిందే. బోర్డర్ - గావస్కర్ ట్రోఫీలో ఆసీస్‌తో జరిగిన తొలి టెస్టులో గిల్ ఆడలేకపోయాడు. తాజాగా గిల్ యొక్క గాయంపై మరొక కీలక విషయం వెలుగులోకి వచ్చింది. వేలికి గాయం ఇంకా పూర్తిగా తగ్గకపోవడంతో, ప్రైమ్‌మినిస్టర్స్ XI జట్టుతో జరిగే రెండు రోజుల వార్మప్ మ్యాచ్‌లో అతడు ఆడడం కష్టమే. అలాగే, అడిలైడ్‌ వేదికగా పింక్‌బాల్ టెస్టులో (AUS vs IND) కూడా అతడు అందుబాటులో ఉండకపోవచ్చని క్రికెట్ వర్గాలు సూచిస్తున్నాయి. గిల్‌కు కనీసం రెండు నుండి మూడు వారాలు విశ్రాంతి అవసరమని బీసీసీఐ వర్గాలు తెలిపాయి. ఈ విశ్రాంతి తర్వాతే అతని గాయం పరిస్థితిని పరిశీలించి, మళ్ళీ పరీక్షిస్తారు.
శుభ్మన్ గిల్‌కు 14 రోజుల విశ్రాంతి
''శుభ్మన్ గిల్‌కు కనీసం 14 రోజుల విశ్రాంతి అవసరమని వైద్య బృందం సూచించింది. వార్మప్ మ్యాచ్‌లో అతడు ఆడడు. రెండో టెస్టు డిసెంబర్ 6న ప్రారంభం కానుంది. అప్పటికే గాయం పరిస్థితిని పరిశీలించి, నిర్ణయం తీసుకుంటారు. గాయం పూర్తిగా తగ్గకపోతే, రెండో టెస్టుకు అతడు దూరం కావడం ఖాయం. గాయం తగ్గితే, రెండో టెస్టుకు ముందు ప్రాక్టీస్ సెషన్‌లో పాల్గొని, తుది జట్టుపై నిర్ణయం తీసుకుంటాం'' అని బీసీసీఐ వర్గాలు తెలిపారు.
షమీ ఎప్పుడు వస్తారు?
సీనియర్ పేసర్ మహ్మద్ షమీ (Shami) ఆసీస్‌కు చేరడంపై ఇంకా అనిశ్చితి కొనసాగుతోంది. రంజీ ట్రోఫీలో తన ఫామ్‌, ఫిట్‌నెస్‌ను నిరూపించుకున్న షమీ, ఐపీఎల్ మెగా వేలంలో కూడా మంచి ధర అందుకున్నాడు. అయితే, రెండో టెస్టుకు షమీ ఆసీస్‌కు చేరతారని ఎటువంటి అధికారిక ప్రకటనలు లేవు. ''షమీని ఆసీస్‌కు పంపించడంపై ఎలాంటి చర్చలు జరగలేదు. అక్కడి మైదానాలు ఫాస్ట్ బౌలర్లకు అనుకూలంగా ఉంటాయని తెలుసు. జట్టులో ఇప్పటికే చాలామంది పేసర్లు ఉన్నారు. పెర్త్‌లో ఫాస్ట్ బౌలర్లు మంచి ప్రదర్శన ఇచ్చారు'' అని బీసీసీఐ వర్గాలు తెలిపారు. ఆస్ట్రేలియాతో రెండో టెస్టుకు దాదాపు పది రోజులు మాత్రమే ఉంది.తొలి టెస్టుకు దూరమైన రోహిత్ శర్మ (Rohit Sharma) జట్టుతో చేరాడు.
తుది జట్టులో ఎవరు ఉంటారు?
అయితే, అతడు ఎవరి స్థానంలో వస్తాడనేది ఒక ప్రశ్నగా మారింది. ఓపెనర్‌గా వచ్చిన కేఎల్ రాహుల్ కీలక ఇన్నింగ్స్‌లతో ఆకట్టుకున్నాడు. అలాగే, దేవదత్ పడిక్కల్ కూడా రెండో ఇన్నింగ్స్‌లో మెరుగైన ప్రదర్శన ఇచ్చాడు. రోహిత్ వస్తే,పడిక్కల్‌ను పక్కన పెట్టే అవకాశాలు ఉన్నాయి. కానీ, ఇప్పుడు బ్యాటర్ల ప్లేస్‌మెంట్‌ కూడా కీలకమైన చర్చాంశంగా మారింది. రోహిత్ శర్మ ఓపెనర్‌గా వస్తారా? లేకపోతే కేఎల్ రాహుల్‌ను కొనసాగిస్తారా? అన్నది చూడాలి. ఒకవేళ రోహిత్‌తో యశస్వి ఓపెనింగ్ ప్రారంభిస్తే,కేఎల్‌ను వన్‌డౌన్‌లో ఆడించాల్సి ఉంటుంది. తదుపరి విరాట్, రిషభ్ పంత్, ధ్రువ్ జురెల్, నితీష్ కుమార్ రెడ్డి బ్యాటింగ్‌కు వచ్చే అవకాశం ఉంది. పింక్‌బాల్ టెస్టులో బౌలింగ్ విభాగంలో పెద్ద మార్పులు ఉండకపోవచ్చని క్రికెట్ విశ్లేషకులు అంచనా వేస్తున్నారు.
