Michelle Santner: న్యూజిలాండ్ జట్టు నూతన కెప్టెన్‌గా మిచెల్ సాంట్నర్
న్యూజిలాండ్ క్రికెట్ బోర్డు వైట్ బాల్ (వన్డే, టీ20) ఫార్మాట్ కోసం కొత్త కెప్టెన్‌ను ప్రకటించింది. ఆల్‌రౌండర్ మిచెల్ సాంట్నర్‌ను పూర్తి స్థాయి కెప్టెన్సీ బాధ్యతలతో న్యూజిలాండ్ క్రికెట్ బోర్డు ఎంపిక చేసింది. కేన్ విలియమ్సన్, ఈ ఏడాది టీ20 ప్రపంచకప్ తర్వాత కెప్టెన్సీ నుంచి రాజీనామా చేసినప్పటి నుంచి సాంట్నర్ ఈ బాధ్యతలను తీసుకుంటున్నారు. ప్రస్తుతం టెస్ట్ జట్టుకు టామ్ లతమ్ కెప్టెన్‌గా వ్యవహరిస్తున్నాడు. న్యూజిలాండ్ తరపున, మిచెల్ సాంట్నర్ మూడు ఫార్మాట్లలో 243 అంతర్జాతీయ మ్యాచ్‌లలో పాల్గొన్నాడు. సాంట్నర్ ఇప్పటికే 24 టీ20లు, 4 వన్డేల్లో న్యూజిలాండ్ జట్టుకు కెప్టెన్సీ చేసిన అనుభవం కలిగిన ఆటగాడు.
చాలా సంతోషంగా ఉంది
సాంట్నర్ తన ఎంపికపై స్పందించారు. వైట్-బాల్ ఫార్మాట్‌కు కెప్టెన్‌గా బాధ్యతలు స్వీకరించడం చాలా సంతోషకరంగా ఉందన్నారు. తాను ఈ ఛాలెంజ్‌ను స్వీకరించడానికి పూర్తిగా సిద్ధంగా ఉన్నానని తెలిపాడు. దేశం తరఫున రెండు ఫార్మాట్లలో జట్టును నడిపించేందుకు అవకాశం పొందడం ఒక గొప్ప గౌరవమన్నారు. సాంట్నర్, ఫిబ్రవరి 2025లో పాకిస్తాన్‌లో జరగే ముక్కోణపు సిరీస్‌తో పూర్తి స్థాయిలో తన కెప్టెన్సీ బాధ్యతలను ప్రారంభించనున్నాడు. ఆ తర్వాత, ఐసీసీ ఛాంపియన్స్ ట్రోఫీ పోటీలు కూడా జరగనున్నాయి.
