IND vs NZ: మ్యాచ్ జరగలేదు.. అయినా ధోనీ రికార్డును బద్దలుకొట్టిన విరాట్ కోహ్లీ!
ఈ వార్తాకథనం ఏంటి
మ్యాచ్ జరగలేదు.. కనీసం ఒక్క బంతి కూడా పడలేదు. అయినప్పటికీ టీమిండియా స్టార్ బ్యాటర్ విరాట్ కోహ్లీ ఖాతాలో ఓ అరుదైన రికార్డు చేరింది. న్యూజిలాండ్ గడ్డపై మాజీ కెప్టెన్ మహేంద్ర సింగ్ ధోనీని వెనక్కి నెట్టి సరికొత్త మైలురాయిని అందుకున్నాడు. మరి ఈ జాబితాలో సచిన్ టెండూల్కర్, జవగళ్ శ్రీనాథ్ ఎక్కడ ఉన్నారు?
వివరాలు
ధోనీని దాటిన విరాట్ కోహ్లీ
భారత్, న్యూజిలాండ్ మధ్య ఐదు మ్యాచ్‌ల వన్డే సిరీస్‌లో భాగంగా మూడో మ్యాచ్ హామిల్టన్‌లోని సెడ్డన్ పార్క్‌లో జరగాల్సి ఉంది.
అయితే భారీ వర్షం కారణంగా మ్యాచ్ ప్రారంభం కాలేదు. చివరకు అంపైర్లు పోటీని రద్దు చేస్తున్నట్లు ప్రకటించారు.
ఈ మ్యాచ్ కోసం ప్రకటించిన భారత తుది జట్టులో విరాట్ కోహ్లీకి చోటు దక్కింది. దీంతో న్యూజిలాండ్ గడ్డపై భారత్ తరఫున అత్యధిక వన్డేలు ఆడిన ఆటగాళ్ల జాబితాలో 16 మ్యాచ్‌లతో కోహ్లీ ముందుకు వెళ్లాడు.
ఇప్పటివరకు 15 వన్డేలు ఆడిన మహేంద్ర సింగ్ ధోనీని అధిగమించాడు.
వివరాలు
అగ్రస్థానంలో సచిన్, శ్రీనాథ్
ఈ జాబితాలో భారత దిగ్గజాలు సచిన్ టెండూల్కర్, జవగళ్ శ్రీనాథ్ సంయుక్తంగా అగ్రస్థానంలో ఉన్నారు. వీరిద్దరూ న్యూజిలాండ్‌లో భారత్ తరఫున చెరో 22 వన్డేలు ఆడారు.
ఆ తర్వాత 19 మ్యాచ్‌లతో మహమ్మద్ అజారుద్దీన్ ఉన్నాడు. రోహిత్ శర్మ 17 మ్యాచ్‌లతో నాలుగో స్థానంలో ఉండగా.. విరాట్ కోహ్లీ 16 మ్యాచ్‌లతో ఐదో స్థానానికి చేరుకున్నాడు.
ధోనీ 15 మ్యాచ్‌లతో తర్వాతి స్థానంలో ఉన్నాడు. ఈ జాబితాలో మరో మెట్టు ఎక్కాలంటే కోహ్లీ మహమ్మద్ అజారుద్దీన్‌ను అధిగమించాల్సి ఉంటుంది.
అగ్రస్థానంలో ఉన్న సచిన్, శ్రీనాథ్ రికార్డును అందుకోవాలంటే మరికొన్ని మ్యాచ్‌లు ఆడాల్సి ఉంది.
వివరాలు
కివీస్ గడ్డపై కోహ్లీ గణాంకాలు
న్యూజిలాండ్ పరిస్థితుల్లో కోహ్లీ ప్రదర్శన కూడా ఆకట్టుకునేలా ఉంది. ఇప్పటివరకు అక్కడ ఆడిన వన్డేల్లో 677 పరుగులు చేశాడు. 48.35 సగటు, 95.35 స్ట్రైక్‌రేట్‌తో పరుగులు సాధించాడు. ఇందులో ఒక సెంచరీ, ఐదు అర్ధ సెంచరీలున్నాయి.
ముఖ్యంగా 2014లో నాపియర్ వేదికగా న్యూజిలాండ్‌తో జరిగిన తొలి వన్డేలో కోహ్లీ ఆడిన ఇన్నింగ్స్ అభిమానులకు ఇప్పటికీ గుర్తుండిపోయింది.
ఆ మ్యాచ్‌లో భారత్ ముందు 293పరుగుల లక్ష్యం నిలిచింది. ఛేదనలో కోహ్లీ అద్భుతంగా ఆడి 111బంతుల్లో 123 పరుగులు చేశాడు.
అతడి ఇన్నింగ్స్‌లో ఏడు ఫోర్లు, రెండు సిక్సర్లు ఉన్నాయి. అయితే కోహ్లీ పోరాటం టీమిండియాకు విజయాన్ని అందించలేకపోయింది.
భారత జట్టు 268 పరుగులకే ఆలౌట్ కావడంతో 24 పరుగుల తేడాతో ఓటమి చవిచూసింది.