ఒకే జట్టు తరుపున బరిలోకి దిగనున్న పుజారా, స్మిత్
భారత్, ఆస్ట్రేలియా జట్ల మధ్య ప్రపంచ టెస్టు ఛాంపియన్ షిప్ ఫైనల్ ముందు ఆసక్తికర ఘటన వెలుగుచూసింది. టీమిండియా బ్యాటర్ ఛతేశ్వర్ పుజారా, ఆస్ట్రేలియా ఆటగాడు స్టీవ్ స్మిత్ లు ఒకే జట్టు తరుపున బరిలోకి దిగనున్నారు. కౌంటీ క్రికెట్లో ఈ ఇద్దరు ఆటగాళ్లు ససెక్స్ తరుపున ఆడనున్నారు. ఇక ససెక్స్ కి సారథ్యం వహిస్తున్న పుజారా, స్మిత్ వరుసగా మూడు, నాలుగు స్థానాల్లో బ్యాటింగ్ చేయనుండటం ప్రస్తుతం ఆసక్తిని రేపుతోంది. డబ్ల్యూటీసీ సన్నాహాల్లో భాగంగా వార్సెస్టర్‌షైర్‌ (మే 4-7), లీసెస్టర్‌షైర్‌ (11-14), గ్లామోర్గాన్‌ (18-21)తో మ్యాచ్‌ల్లో స్మిత్ బరిలో దిగనున్నాడు.
స్మిత్ తో కలిసి జట్టులో ఉండడం ఆనందంగా ఉంది: పుజారా
తామిద్దరం మాట్లాడుకున్నామని, ఎక్కువ సార్లు ఒకరితో ఒకరు తలపడ్డామని, అయితే ఒకే జట్టు తరుపున ఎప్పుడూ కలిసి ఆడలేదని పుజారా పేర్కొన్నారు. స్మిత్ తో కలిసి జట్టులో ఉండడం ఆనందంగా ఉందని, స్మిత్ ఆలోచనల్ని, అతడిని ఇంకాస్త మెరుగ్గా తెలుసుకోవడానికి ప్రయత్నం చేస్తానని, అయితే మైదానం వెలువల తాము మంచి స్నేహితులమని పుజారా గుర్తు చేశాడు. ఇక టీమిండియా, ఆస్ట్రేలియా మధ్య డబ్య్లూటీసీ ఫైనల్ మ్యాచ్ జూన్ 7నుంచి ప్రారంభం కానుంది.
