వరుస వైఫల్యాలతో తొలిసారి టాప్-10లో చోటు కోల్పోయిన పీవీ.సింధు
భారత్ స్టార్ షట్లర్ పీవీ సింధు వరుస వైఫల్యాలతో నిరాశ పరుస్తోంది. తాజాగా బిడబ్ల్యూఎఫ్ ప్రకటించిన ర్యాంకింగ్‌లో 2016 తర్వాత తొలిసారి టాప్-10లో చోటు కోల్పోయింది. గతవారం ముగిసిన స్విస్ ఓపెన్ లో సింధు మహిళల సింగిల్స్ డిఫెండింగ్ ఛాంపియన్‌గా బరిలోకి దిగి ఫ్రిక్వార్టర్‌లో నిష్ర్కమించింది. ఈ ఏడాది ఒక్క టైటిల్ కూడా గెలవలేకపోయిన పీవీసింధు 60,448 పాయింట్లతో 11వ ర్యాంక్‌కు పరిమితమైంది. 2016 రియో ఒలింపిక్స్‌లో రజత పతకాన్ని, టోక్యో ఒలింపిక్స్‌లో కాంస్య పతకాన్ని పీవీ సింధు గెలుచుకుంది. ఆమె మొదట ఆగస్ట్ 2013లో టాప్ 10లోకి ప్రవేశించింది. ఇండియా ఓపెన్ సూపర్‌సిరీస్‌లలో ఆమె ఫైనల్స్‌లో కరోలినా మారిన్‌ను ఓడించి, ఏప్రిల్ 2017లో సింధు అప్పట్లో నెంబర్ 2 ర్యాంకును సాధించింది
31వ ర్యాంకులో సైనా నెహ్వాల్
సింధు తన కెరీర్‌లో అద్భుతమైన రికార్డును సాధించింది. రెండు ఒలింపిక్స్ పతకాలను సొంతం చేసుకున్న తొలి భారతీయ మహిళగా నిలిచింది. 2016లో రియో ఒలింపిక్స్ ఫైనల్స్‌లో మారిన్ చేతిలో ఓడిపోయిన సింధు, రజతంలో సరిపెట్టుకోవాల్సి వచ్చింది. భారత్ కు చెందని మరో స్టార్ ప్లేయర్, ప్రపంచ మాజీ నంబర్‌వన్‌ సైనా నెహ్వాల్ ఒక స్థానం ఎగబాకి 31వ ర్యాంక్‌లో నిలవడం విశేషం.
