PV Sindhu: పెళ్లి బంధంలోకి అడుగుపెట్టిన భారత బ్యాడ్మింటన్‌ స్టార్‌ పీవీ సింధు
భారత బ్యాడ్మింటన్‌ చాంపియన్ పివి.సింధు, పోసిడెక్స్‌ టెక్నాలజీస్‌ సంస్థ ఎగ్జిక్యూటివ్‌ డైరెక్టర్‌ వెంకట దత్తసాయి వివాహ బంధంలోకి అడుగు పెట్టారు. ఆదివారం ఉదయ్‌పూర్‌లోని ఒక దీవిలో కుటుంబ సభ్యులు,అత్యంత సన్నిహితుల మధ్య ఈ వివాహం అంగరంగ వైభవంగా జరిగింది. సంప్రదాయ తెలుగు ఆచారాలతో, శాస్త్రోక్తంగా నిర్వహించిన ఈ వేడుకలో పండితుల వేద మంత్రాల నడుమ రాత్రి 11.20 గంటలకు దత్తసాయి సింధు మెడలో మూడు ముళ్లు వేశాడు. సుమారు 140 మంది అతిథులు,కుటుంబ సభ్యులు, స్నేహితుల సమక్షంలో ఈ వేడుక అట్టహాసంగా సాగింది. తెలుగుదనానికి అనుగుణంగా,రాజస్థాన్‌ రాచరిక సంప్రదాయాలను ప్రతిబింబించేలా ఏర్పాట్లు చేశారు. ఈ వేడుకకు ఐపీఎల్‌ గవర్నింగ్‌ కౌన్సిల్‌ సభ్యుడు చాముండేశ్వర్‌నాథ్‌,వ్యాపారవేత్త నిమ్మగడ్డ ప్రసాద్‌, ప్రముఖ వైద్యుడు గురువారెడ్డి తదితరులు హాజరయ్యారు.
పెళ్లి వేదిక ప్రత్యేకత
మంగళవారం రాత్రి హైదరాబాద్‌లో ఈ కొత్త జంట వివాహ రిసెప్షన్‌ నిర్వహించనున్నారు. సింధు వివాహం ఉదయ్‌సాగర్‌ సరస్సులోని 21 ఎకరాల విస్తీర్ణంలో ఉన్న ఒక దీవి వద్ద జరిగింది. ఆరావళి పర్వతాల నడుమ ఉన్న ఈ ప్రత్యేక స్థలంలో రఫల్స్‌ సంస్థ నిర్మించిన,రాజప్రసాదాన్ని తలపించే భవంతులతో కూడిన రిసార్ట్‌ ఏర్పాటు చేశారు. ఇందులో వంద గదులతో మూడు ప్రధాన భవంతులు ఉన్నాయి.వివాహం కోసం అతిథులను ప్రత్యేక పడవల్లో వేదికకు తీసుకెళ్లారు. ఈ రిసార్ట్‌లో సాధారణ గదికి రోజుకు అద్దె రూ.లక్ష వరకు ఉంటుందని తెలిసింది. సింధు కుటుంబం ఈ వివాహ వేడుక కోసం మొత్తం 100 గదులను బుక్‌ చేయడమే కాకుండా, వివాహానికి హాజరైన వారికోసం ప్రత్యేక విమాన టిక్కెట్లు కూడా అందించింది.
