IPL-Cricket-Chennai: వారి వల్లే గెలిచాం...చెన్నై సూపర్ కింగ్స్ జట్టు కెప్టెన్ రుతురాజ్ గైక్వాడ్
ఎం ఎస్ ధోని వల్లే తాము గెలిచామని చెన్నై ఐపీఎల్ క్రికెట్ జట్టు కెప్టెన్ రుతురాజ్ గైక్వాడ్ అభిప్రాయపడ్డారు. ఐపీఎల్ (IPL)క్రికెట్ టోర్నీలో భాగంగా ఆదివారం రాత్రి ముంబై (Mumbai) లోని వాంఖెడే స్టేడియంలో ముంబై జట్టుతో జరిగిన మ్యాచ్ లో చెన్నై(Chennai) సూపర్ కింగ్స్ జట్టు 20 పరుగుల తేడాతో విజయం సాధించిన సంగతి తెలిసిందే. చెన్నై జట్టు సభ్యుడు ఎంఎస్ ధోనీ (Dhoni) చివరి ఓవర్ లో వరుసగా మూడు సిక్స్ లు బాది జట్టు స్కోరును పరుగులెత్తించాడు. ఇక బౌలింగ్లో పతిరన నిప్పులు చెరిగి బంతులు వేసి ముంబై ఇండియన్స్ జట్టును ముప్పు తిప్పలు పెట్టాడు.
రుతురాజ్, శివమ్ ధూబేలు అర్థ సెంచరీలు
కాగా అంతకుముందు బ్యాటింగ్ కు దిగిన చెన్నైసూపర్ కింగ్స్ జట్టు రుతురాజ్, శివమ్ ధూబేలు అర్థ సెంచరీలు సాధించి జట్టును పటిష్ట స్థితిలో నిలిపారు. తుషార్, శార్దూల్ ఠాకూర్ లు కూడా బౌలింగ్ లో మంచి ప్రదర్శన చేసి ముంబై జట్టును నిలువరించారు. తమ ఇన్నింగ్స్ లో స్కోరు బోర్డు మీద మరో 20 పరుగులు అదనంగా చేస్తే మరింత పటిష్టంగా ఉండేదని రుతురాజ్ అభిప్రాయపడ్డారు. తాను ఏస్థానంలోనైనా బ్యాటింగ్ చేయడానికి ముందుంటానని వెల్లడించారు. ఇక ముంబై ఇన్నింగ్స్ ప్రారంభించిన తర్వాత పవర్ ప్లే లోనే 60కి పైగా పరుగులు చేసి లక్ష్య ఛేదన వైపు అడుగులు వేసిన ఆ జట్టు పతిరన తన అద్భుతమైన బౌలింగ్ ప్రదర్శన ద్వారా కట్టడి చేసేశాడు.
ధోనీ చేసిన ఆ 20 పరుగులే కాపాడాయి
ఫలితంగా ముంబై జట్టుపై 20 పరుగుల తేడాతో చెన్నై జట్టు గెలిచింది. ఆఖరి ఓవర్లో ధోనీ చేసిన ఆ 20 పరుగులే జట్టును కాపాడాయని రుతురాజ్ తెలిపారు.
